کسی صوبے کا پانی دوسرے صوبے کے حصے میں نہیں جا سکتا،رانا ثنا اللہ خان

(رائو دلشاد)  وزیراعظم  کے مشیر برائے بین الصوبائی رابطہ رانا ثنا اللہ خان نے کہا ہے کہ قائد محمد نواز شریف اور  وزیراعظم شہباز شریف نے پی پی پی سے بات چیت کے ذریعے مسائل کے حل کی ہدایت کی ہے۔
‎رانا ثناء اللہ نے ایک بیان میں کہا ہے کہ اکائیوں کے پانی سمیت وسائل کی منصفانہ تقسیم پر مکمل یقین رکھتے ہیں،پیپلز پارٹی وفاق کا حصہ ہے، آئینی عہدوں پر رہتے ہوئے بات زیادہ ذمہ داری سے کرنی چاہئے، ہمیں پی پی پی کی قیادت کا بہت احترام ہے۔ 1991ء میں صوبوں کے درمیان طے پانے والے معاہدے اور 1992ء کے ارسا ایکٹ کی موجودگی میں کسی سے ناانصافی نہیں ہو سکتی۔ انہوں نے مزید کہا کہ کسی صوبے کا پانی دوسرے صوبے کے حصے میں نہیں جا سکتا،  اس امر کو یقینی بنانے کے لیے ملک میں آئینی طریقہ کار اور قوانین موجود ہیں ،  پانی کے مسئلے پر سیاست نہیں کرنی چاہیے، معاملات میز پر بیٹھ کر حل کرنے چاہئیں۔ رانا ثنا اللہ خان نے کہا اکائیوں کی مضبوطی کو وفاق کی مضبوطی سمجھتے ہیں، ماضی کی طرح اسی طرز عمل پر چلتے رہیں گے ، آئین و جمہوریت پر پختہ یقین رکھنے والی جماعت کے طور پر اکائیوں اور اس میں رہنے والے عوام کے حقوق کے تحفظ پر سمجھوتہ کیا نہ کریں گے ،بات چیت اور مشاورت ہی ہر مسئلے کا حل ہے۔