انسٹاگرام ،زکربرگ نے ’خریدو یا دفن کرو‘ کی پالیسی کے تحت خریدداری  کا فیصلہ کیا

(ویب ڈیسک)فیس بک، واٹس ایپ اور انسٹاگرام کی مالک کمپنی میٹا پلیٹ فارمز انکارپوریٹڈ کے  چیف ایگزیکٹو آفیسر مارک زکربرگ نے ایک مقدمے کی سماعت کے دوران انکشاف کیا کہ انسٹاگرام کی خریداری کے پیچھے ایک اہم وجہ اس کا ‘بہتر کیمرہ‘ تھا، جو اُس وقت فیس بک کے لیے میٹا خود بنانے کی کوشش کر رہا تھا۔

بین الاقوامی نیوز ایجنسی‘رائٹرز‘ کے مطابق زکربرگ کے اس بیان سے امریکی فیڈرل ٹریڈ کمیشن کے اس مؤقف کو تقویت ملی ہے کہ میٹا نے مبینہ طور پر ابھرتے ہوئے حریفوں کو ختم کرنے اور اپنی اجارہ داری کو برقرار رکھنے کے لیے ’خریدو یا دفن کرو‘ (buy or bury) کی پالیسی اپنائی۔یہ بیان اس وقت سامنے آیا جب زکربرگ نے واشنگٹن میں اینٹی ٹرسٹ مقدمے کے دوسرے روز گواہی دیتے ہوئے بتایا کہ فیس بک اور انسٹاگرام کے درمیان ‘کیمرہ ایپ‘ کے معیار میں فرق تھا، اور اسی بنیاد پر خریداری کا فیصلہ کیا گیا۔ انہوں نے کہا کہ ہم اُس وقت ایک کیمرہ ایپ بنانے کی کوشش کر رہے تھے، مگر انسٹاگرام کی پروڈکٹ ہم سے بہتر تھی، اس لیے میں نے فیصلہ کیا کہ ہمیں انسٹاگرام خرید لینا چاہیے۔زکربرگ نے عدالت کو مزید بتایا کہ کمپنی کی ماضی میں متعدد بار نئی ایپس بنانے کی کوششیں ناکامی سے دوچار ہو چکی ہیں۔نئی ایپ تیار کرنا آسان نہیں ہوتا۔ ہم نے اپنی تاریخ میں درجنوں ایپس بنانے کی کوشش کی، لیکن زیادہ تر کو وہ توجہ نہیں ملی جس کی ہمیں امید تھی۔

واضح رہے کہ مقدمے میں پیش کیے گئے شواہد میں فیس بک کے بانی کی ایک پرانی ای میل بھی شامل ہے جس میں انہوں نے لکھا تھا کہ مقابلہ کرنے سے کہیں بہتر ہے کہ خرید لیا جائے۔

یہ بھی پڑھیں:شیخ حسینہ اور ساتھی شکنجے میں آ گئے،انٹرپول کو ریڈ نوٹس جاری کرنے کی درخواست