پی ڈی ایم کرپشن کی کشتی میں سوار ہے,فردوس عاشق

 (24نیوز)وزیر اعلیٰ پنجاب عثمان بزدار کی معاون خصوصی ڈاکٹر فردوس عاشق اعوان کاکہنا ہے کہ کچھ سیاسی یتیم عمران خان کو تنقید کا نشانہ بنارہے ہیں۔ پاناما رانی کرپشن کی کہانی جبکہ پی ڈی ایم پوری کی پوری کرپشن کی کشتی میں سوار ہے۔ کرپشن کی کشتی کا ڈوبنا لازمی ہے۔

تفصیلات کے مطابق سیالکوٹ میں میڈیا سے  گفتگوکرتے ہوئے فردوس عاشق اعوان نے کہا کہ سرکاری اراضی پر سیاسی لٹیروں نے قبضہ کرکے ذاتی کاروبار کیلئے استعمال کیا۔وزیراعلیٰ پنجاب کی قیادت میں قبضہ گروپوں سے قیمتی اراضی واگزار کرائی گئی ہے۔ وزیراعلیٰ پنجاب نے ریونیو ریکارڈ کو محفوظ بنانے کا سلسلہ شروع کیا ہے۔ملی بھگت کرکے ریونیو ریکارڈ کرکے من پسند تبدیلیاں کردی جاتی تھیں،اب 115 اراضی ریکارڈ سنٹر قائم کئے جارہے ہیں۔

معاون خصوصی کا کہنا تھا کہ وفاق اور پنجاب کی زمینوں کے کاغذات میں ہیرا پھیری کرکے استفادہ حاصل کیا جاتا تھا۔شوباز شریف کیلئے ریکارڈ جلوادینا معمول تھا۔پنجاب حکومت نے آن لائن فرد کا اجرا کردیا ہے۔انہوں نے کہا کہ اس کا براہ راست فائدہ سمندر پار پاکستانیوں کو ہوگاان کی سہولت کیلئے 4 ممالک میں خصوصی کاونٹر قائم کئے جا رہے ہیں جبکہ پنجاب کے مینئول ریکارڈ کو ڈیجیٹل بنانے کا کام جاری ہے۔ پاکستان میں پٹواری عوام کے جیبوں میں ڈاکا ڈالنے کا باعث بنتے رہے۔عوام کی جیبوں کو محفوظ بنانے کیلئے پٹواریاں کا خاتمہ کرکے ولیج افسر کا درجہ دینے جارہے ہیں۔