( 24 نیوز )پاکستان کی میزبانی میں ہونے والی چیمپیئنز ٹرافی 2025 کا آج سے باضابطہ آغاز ہو رہا ہے، اور ایونٹ کے پہلے میچ میں پاکستان اور نیوزی لینڈ کی ٹیمیں آمنے سامنے ہوں گی۔ یہ میچ نیشنل سٹیڈیم کراچی میں کھیلا جائے گا، جہاں ہزاروں شائقین کی آمد متوقع ہے، لیکن شائقین کیلئے اسٹیڈیم میں داخل ہونے کیلئے کچھ شرائط عائد کی گئی ہیں۔
ایونٹ کے دوران سکیورٹی اور انتظامی معاملات کو یقینی بنانے کے لیے منتظمین نے شائقین کے لیے ایس او پیز جاری کر دی ہیں۔ ان ہدایات کے مطابق، میچ دیکھنے کے لیے آنے والے افراد کچھ اشیاء اپنے ساتھ اسٹیڈیم نہیں لے جا سکیں گے۔
مزید پڑھیں:محمدعامر کی پاکستانی ٹیم سے متعلق بڑی پیش گوئی
ایس او پیز کے تحت شائقین کو پاور بینک اور ایئرپوڈز لے جانے کی اجازت نہیں ہوگی۔ اسی طرح، گٹکا یا چھالیہ بھی سٹیڈیم لے جانے پر پابندی عائد کر دی گئی ہے۔
شائقین کے لیے کھانے پینے کی اشیاء یا پانی کی بوتلیں سٹیڈیم میں لانے کی بھی اجازت نہیں ہوگی۔
ان چیزوں کے ساتھ آنے والوں کو سکیورٹی اہلکار اسٹیڈیم میں داخل ہونے سے روک دیں گے۔
اس کے علاوہ، داخلے کے لیے اصل شناختی کارڈ اور ٹکٹ کی ہارڈ کاپی ساتھ رکھنا لازمی قرار دیا گیا ہے، کیونکہ آن لائن ٹکٹ یا اس کی سافٹ کاپی دکھانے پر داخلے کی اجازت نہیں دی جائے گی۔