آئی سی سی کی بڑی غلطی نے بھارتی ٹیم کو 2 گھنٹے کیلئے خوش کردیا

(ویب ڈیسک) انٹرنیشنل کرکٹ کونسل (آئی سی سی)کی بڑی غلطی کے باعث بھارتی کرکٹ ٹیم اور مداحوں کو کچھ گھنٹوں کیلئے خوشی مل گئی۔
رپورٹس کے مطابق اس غلطی کی وجہ سے بھارتی ٹیم آسٹریلیا کو پیچھے چھوڑ کر بغیر سیریز کھیلے صرف 2 گھنٹے کیلئے ٹیسٹ رینکنگ کی نمبر 1 ٹیم بن گئی۔رپورٹس کے مطابق اس وقت نہ ہی بھارت اور نہ ہی آسٹریلیا کوئی بھی ٹیسٹ سیریز کھیل رہے ہیں تاہم ایک غلطی کے باعث دونوں ٹیموں کی ویب سائٹ پر پوزیشن تبدیل ہوگئی۔
بھارتی میڈیا کے مطابق آئی سی سی کی ویب سائٹ پر غلطی کو صحیح سمجھ کر کئی مداحوں نے بھارتی ٹیم کی پہلی پوزیشن کے حوالے سے ٹوئٹس کرنا بھی شروع کر دیئے تھے تاہم ان کی یہ خوشی 2گھنٹے ہی برقرار رہ سکی۔
رپورٹس کے مطابق آئی سی سی ٹیسٹ رینکنگ میں تبدیلی ہمیشہ کسی بھی سیریز کے اختتام پر کی جاتی ہے۔آئی سی سی رینکنگ میں آخری مرتبہ تبدیلی 8 جنوری کو ہوئی تھی جب آسٹریلیا نے جنوبی افریقہ کو شکست دی تھی۔واضح رہے کہ اس وقت ٹیسٹ رینکنگ میں آسٹریلیا پہلے ،بھارت دوسرے اورانگلینڈ تیسرے نمبر پر موجود ہے۔

یہ بھی پڑھیں: ہاشم آملہ کاتمام طرز کی کرکٹ سے ریٹائرمنٹ کا اعلان