گرے لسٹ میں بھارتی کردار ۔۔ پاکستانی سیاست دانوں نے فیٹف کے کردارپر سوال اٹھا دئیے

  (24نیوز) بھارت کی جانب سے فنانشل ایکشن ٹاسک فورس (ایف اے ٹی ایف) میں پاکستان کا نام گرے لسٹ میں شامل رکھنے کی کوششوں کے اعتراف کے بعد پاکستانی سیاست دانوں نے عالمی مالیاتی ادارے کے کردار پر سوالات اٹھا دئیے۔حکمران جماعت پاکستان تحریک انصاف سمیت حزب اختلاف کے سیاستدانوں نے بھی فیٹف کے کردار پر سوالات اٹھاتے ہوئے اس سے بھارتی اعتراف سے متعلق وضاحت جاری کرنے کا مطالبہ کیا ہے۔
گزشتہ روز ہندوستان ٹائمز نے اپنی رپورٹ میں بتایا تھا کہ بھارت کے وزیر برائے امور خارجہ ایس جے شنکر نے کہا ہے کہ بھارتی حکومت نے اس بات کو یقینی بنایا ہے کہ پاکستان فنانشل ایکشن ٹاسک فورس (ایف اے ٹی ایف) کی گرے لسٹ میں شامل رہے۔انہوں نے کہا تھا کہ ہم پاکستان پر دباؤ ڈالنے میں کامیاب رہے ہیں اور حقیقت یہ ہے کہ پاکستان کے طرز عمل میں تبدیلی آئی ہے جس کی وجہ بھارت کی جانب سے مختلف اقدامات کے ذریعے دباؤ ڈالنا ہے۔
رپورٹ کے مطابق بھارتی وزیر نے اجلاس کے دوران لشکر طیبہ اور جیش محمد جیسی کالعدم تنظیموں پر پابندیوں کا بھی ’اقوام متحدہ کے توسط سے‘ بھارتی حکومت کی کوششوں کا سہرا اپنے سر سجایا ہے ا۔ایس جے شنکر کے مذکورہ اعتراف کے بعد اگرچہ ترجمان دفتر خارجہ نے بھی اپنا بیان جاری کیا تھا، تاہم اب مختلف وزرا اور سیاست دانوں نے بھی اس معاملے پر بات کی ہے۔وزیر خارجہ شاہ محمود قریشی نے اپنی ٹوئٹ میں لکھا کہ پاکستان نے ہمیشہ کہا کہ فیٹف میں بھارت سیاست کر رہا ہے اور اب بھارت کے حالیہ بیان نے اس کو واضح اور سچ ثابت کردیا۔
وزیر خارجہ نے لکھا کہ اہم تکنیکی پلیٹ فارم میں پاکستان کے لیے جوڑ توڑ یقینی طور پر حیران کن ہے مگر مودی سرکار کے لیے یہ باعث حیرت نہیں۔وزیر توانائی حماد اظہر نے بھی اس معاملے پر ٹوئٹ کی اور لکھا کہ بھارت کے وزیر برائے امور خارجہ کا بیان اس بات کی تصدیق کرتا ہے کہ پاکستان جو کچھ بھی کہ رہا تھا وہ درست تھا اور یہ کہ انڈیا فیٹف میں سیاست کرکے اس کی روح کو متاثر کر رہا ہے۔انہوں نے لکھا کہ فیٹف کے حوالے سے پاکستانی کوششیں ناقابل تردید ہیں اور جلد ہی اپنے تمام منصوبوں کو عملی جامہ پہنایا جائے گا۔
انسانی حقوق کی وزیر شیریں مزاری نے اس معاملے پر ٹوئٹ کی اور ساتھ ہی انہوں نے بھارتی وزیر کے اعترافی بیان کی خبر کا لنک بھی شیئر کیا۔شیریں مزاری نے لکھا کہ پاکستان مخالف پالیسیوں کی وجہ سے مودی سرکار پریشانی کا شکار ہے اور یہ کہ جموں و کشمیر سمیت افغانستان میں بھارتی مداخلت سمیت کورونا کی وبا پر قابو نہ پانے اور عالمی وبا پر پاکستان کے قابو پانی کی تعریفوں کی وجہ سے انڈین حکومت حواس باختہ ہے۔انہوں نے لکھا کہ پریشانی کا شکار مودی سرکار اب فیٹف جیسے اداروں کی ساکھ کو متاثر کرنے میں مصروف ہے جو کہ تکنیکی طور پر سیاسی حوالے سے کام کرتا ہے۔
شیریں مزاری نے لکھا کہ یادیو نیٹ ورک کے ساتھ پڑوس میں دہشت گردوں کی معاونت کرنے والی مودی سرکار اب بے نقاب ہو چکی ہے۔ انہوں نے فیٹف میں بھارتی رکنیت پر بھی سوال اٹھایا۔وفاقی وزیر علی حیدر زیدی نے بھی بھارتی وزیر کے بیان کی اعترافی خبر کا لنک شیئر کرتے ہوئے ٹوئٹ کرتے ہوئے سوال اٹھایا کہ اب بھارت اینٹی منی لانڈرنگ کے عالمی فورم پر بھی اثر انداز ہو رہا ہے؟۔
قائد حزب اختلاف شہباز شریف نے بھی اس معاملے پر ٹوئٹ کی اور لکھا کہ بھارتی وزیر نے اعتراف کیا ہے کہ بھارت نے فیٹف میں اس بات کی کوشش کی کہ پاکستان کا نام گرے لسٹ میں برقرار رہے اور یہ اعتراف عالمی ادارے کے تشخص پر سوال اٹھاتا ہے۔انہوں نے مطالبہ کیا کہ فیٹف کو واضح کرنا ہوگا کہ وہ دوسروں کے کہنے پر پاکستان کے خلاف استعمال نہیں ہو رہا ہے۔ 
 قبل ازیں وزارت خارجہ نے بھی اس معاملے پر ٹوئٹ کی تھی اور کہا تھا کہ بھارت کے وزیر خارجہ کے بیان نے بھارت کے ’حقیقی رنگ‘ اور ’گمراہ کن‘ کردار کو بے نقاب کیا۔ٹوئٹ میں کہا گیا کہ پاکستان ہمیشہ عالمی برادری کو بھارت کے ایف اے ٹی ایف میں سیاست کرنے اور اس کی کارروائی میں رکاوٹیں ڈالنے کے بارے میں بات کرتا رہا ہے، حالیہ بھارتی بیان پاکستان کے خلاف ایک اہم تکنیکی فورم کو استعمال کرنے کے لیے جاری کوششوں کی حمایت کرتا ہے۔سلسلہ وار ٹوئٹس میں کہا گیا تھا کہ جہاں ایکشن پلان پر عمل درآمد کے دوران پاکستان ایف اے ٹی ایف کے ساتھ مخلصانہ اور تعمیری طور پر مشغول رہا ہے وہیں بھارت نے مذموم اقدامات سے پاکستان کی پیش رفت پر شکوک و شبہات پیدا کرنے میں کوئی کسر نہیں چھوڑی ہے۔
یہ بھی پڑھیں۔یہ ہے دلہن۔۔۔۔ دلہا دیکھتے ہی فرار