(24 نیوز ) پنجاب کی سینئر وزیر مریم اورنگزیب نے پاکستان تحریک انصاف پر تنقید کرتے ہوئے کہا ہے کہ بانی پی ٹی آئی عمران خان اور ان کی پارٹی کا واضح پیغام ہے کہ ہم دہشتگردی کے خلاف قوم کے ساتھ نہیں ہیں۔یہ ملک کیلئے نہیں جی ایچ کیو پر حملے کیلئے اکٹھے ہو جاتے ہیں۔
مریم اورنگزیب نے نیوز کانفرنس سے خطاب کرتے ہوئے کہا کہ کل نیشنل سکیورٹی پر پارلیمانی کمیٹی کی میٹنگ ہوئی جس میں تمام سیاسی جماعتیں مخالفت بھلا کر پارلیمنٹ میں موجود تھیں، کل تمام عسکری قیادت اور سکیورٹی اداروں کے حکام موجود تھے اور پارلیمنٹ سے دہشتگردی اور دہشتگردوں کیخلاف ایک اعلامیہ آیا، اس اعلامیہ پر صرف ایک جماعت کے دستخط نہیں اور یہ کوئی نئی بات نہیں۔ کل پی ٹی آئی نے کمیٹی اجلاس میں شرکت نہ کر کے سپورٹ کرنے والوں کی ترجمانی سے گریز کیا، بانی پی ٹی آئی عمران خان اور ان کی پارٹی کا واضح پیغام ہے کہ ہم دہشتگردی کے خلاف قوم کے ساتھ نہیں ہیں۔ انہوں نے کہا کہ عمران خان سے سوال بنتا ہے کہ جب سب کو متحد ہونے کی ضرورت ہے تو یہ انکار کیوں کرتے ہیں؟ قوم کی نظریں تھیں ایک بیانیہ آئے گا لیکن یہ جماعت ایک قیدی کی طرف دیکھ رہی تھی، عمران خان نے 190 ملین پاؤنڈ کی چوری کی ہے، نیشنل سکیورٹی کی میٹنگ کیلئے چور کا ذکر کہاں سے آگیا؟انہوں نے کہا کہ پی ٹی آئی نے ملک کیلئے اکٹھے نہیں ہونا لیکن جی ایچ کیو پر حملے کیلیے اکٹھے ہو جاتے ہیں، پی ٹی آئی نے قومی سلامتی کے کسی اجلاس میں شرکت نہیں کی، یہ ان کا نعرہ ہے کہ ’خان نہیں تو پاکستان نہیں‘، پی ٹی آئی نے سوشل میڈیا پر فوج کے خلاف ہرزہ سرائی کی۔
سینئر وزیر کا مزید کہنا تھا کہ پہلے بھی خیبر پختونخوا کو دہشتگردی سے نمٹنے کیلئے 800 ملین دیئے گئے لیکن وہاں سی ٹی ڈی آج تک کرائے کی عمارت پر قائم ہے، کہتے ہیں وفاق کی وجہ سے صوبے میں دہشتگردی پھیل رہی ہے، جب یہ وزیر اعظم تھا تب بھی یہ کسی کے ساتھ ملکی معاملات پر نہیں بیٹھا تھا۔انہوں نے کہا کہ سوشل میڈیا کے عالمی اکاؤنٹس سے مذمتی بیان کیوں نہیں آیا؟ انھیں صرف نفرت پھیلانا اور آگ لگانے کا کام آتا ہے، جب دہشتگردی ہوتی ہے تو یہ لوگ فوج کے خلاف بیانیہ بنانا شروع کر دیتے ہیں۔مریم اورنگزیب نے مطالبہ کیا کہ وزیر اعلیٰ علی امین گنڈاپور سے حکومت نہیں چلتی تو استعفیٰ دیں۔
یہ بھی پڑھیں:قومی اسمبلی کی مبینہ ملازمہ کا شہری کو نوکری اور ویزے کا جھانسہ،عدالت نے بڑا حکم دیدیا