دہشتگرد عناصر کو ہر قیمت پر شکست دینگے، صدر آصف زرداری

(عیسیٰ ترین)صدر مملکت آصف علی  زرداری  نے کہا ہے کہ دہشتگرد عناصر کو ہر قیمت پر شکست دیں گے،صورتحال واضح ہے ریاست نے رہنا ہے، دہشت گردی کے خلاف جنگ جیتنی ہے۔

صدر مملکت آصف علی زرداری کی زیر صدارت کوئٹہ میں امن و امان کی صورتحال پر اہم اجلاس  ہوا،اجلاس میں چئیرمین پیپلزپارٹی بلاول بھٹو زرداری نے خصوصی شرکت  کی،وزیر اعلیٰ بلوچستان میر سرفراز بگٹی نے صوبے میں امن و امان کی صورتحال پر بریفنگ دی۔اجلاس میں قائم مقام گورنر بلوچستان کیپٹن ریٹائرڈ عبدالخالق اچکزئی،  چیف سیکرٹری بلوچستان شکیل قادر خان،  آئی جی پولیس معظم جاہ انصاری،  سمیت اعلیٰ حکام نے شرکت کی۔

صدر مملکت آصف زرداری نے خطاب کرتے ہوئے کہاکہ دہشت گرد عناصر کو ہر قیمت پر شکست دیں گے، دہشت گرد قوم کو تقسیم کرنا چاہ رہے ہیں،  صورتحال واضح ہے ریاست نے رہنا ہے، دہشت گردی کے خلاف جنگ جیتنی ہے، انسداد دہشت گردی ونگ کو جدید اسلحہ فراہم کریں گے۔

صدر مملکت نے کہاکہ بلوچستان دل کے قریب ہے ،صوبے کی ترقی اور پائیدار امن چاہتے ہیں ،بلوچستان کے ہر بچے کو سکول میں دیکھنا چاہتے ہیں،ان کا کہناتھا کہ جدید ٹیکنالوجی سے بچوں کو روشناس کروانا وقت کی ضرورت ہے۔

یہ بھی پڑھیں:سولر پینلز کی قیمتوں میں بڑی کمی