وہ دور گیا جب ملزمان کو تکنیکی وجوہات کی بنیاد پر چھوڑ دیا جاتا تھا،  قاضی محمد امین

(24نیوز)سپریم کورٹ نے پانچ کلو چرس اسمگلنگ کے ملزم ظفر اللّٰہ کی سزا کے خلاف دائر اپیل خارج کردی

تفصیلات کے مطابق  سپریم کورٹ کے جسٹس قاضی محمد امین نے ریمارکس دیے ہیں کہ پاکستان منشیات فروشوں کے لیے جنت بنا دیا گیا ہے۔جسٹس اعجازالاحسن کی سربراہی میں سپریم کورٹ کے تین رکنی بینچ نے پانچ کلو چرس اسمگلنگ کے ملزم ظفر اللّٰہ کی سزا کے خلاف دائر اپیل کی سماعت کی۔ملزم کے وکیل نے دلائل دیے کہ منشیات کے نمونوں کو ایس او پی کے تحت نہیں جانچا گیا، تمام گواہیاں سرکاری ملازمین کی جانب سے ریکارڈ کروائی گئیں، کوئی غیر جانبدار گواہ عدالت میں پیش نہیں کیا گیا۔

  قاضی محمد امین نے ریمارکس دیے کہ وہ دور گیا جب ملزمان کو تکنیکی وجوہات کی بنیاد ملزمان کو چھوڑ دیا جاتا تھا، ہمارے ملک میں نام نہاد شرفاء گواہی دینے کو تیار نہیں ہوتے، ملزم کسی دوسرے ملک میں منیشات کیس میں گرفتار ہوتا تو اسے لٹکا دیا جاتا، پاکستان منشیات فروشوں کے لیے جنت بنا دیا گیا ہے۔ جسٹس اعجازالاحسن نے بھی کہا کہ ملزم کے خلاف شہادتوں کی لڑی مکمل ہے۔

سپریم کورٹ نے ملزم ظفر اللّٰہ کی سزا کے خلاف دائر اپیل خارج کردی۔ ملزم کو 13 دسمبر 2013 کو نواب شاہ کے علاقے سے گرفتار کیا گیا تھا اور ماتحت عدالتوں نے ساڑھے سات سال قید کی سزا سنائی تھی۔

یہ بھی پڑھیں:    منشیات فروش دو بھائی گرفتار، 93 کلو چرس برآمد