اے آر رحمان کی اہلیہ کا شادی کے 29 سال بعد شوہر سے علیحدگی کا اعلان

(24نیوز) بھارت کے معروف موسیقار اور گلوکار اللہ رکھا (اے آر )رحمان کی اہلیہ سائرہ بانو نے شادی کے 29 سال بعد شوہر سے علیحدگی کا اعلان کر دیا۔

میڈیارپورٹس  کے مطابق سائرہ بانو  کی وکیل وندنا شاہ کی جانب سے اے آر رحمان اور سائرہ  کی علیحدگی کے حوالے سے ایک بیان جاری کیا گیا ہے،بیان میں کہا گیا ہے کہ کئی سالوں کی شادی کے بعد سائرہ نے اپنے شوہر اے آر رحمان سے علیحدگی کا مشکل فیصلہ کیا ہے، یہ فیصلہ ان کے تعلقات میں پیچیدگی کے باعث کیا گیا ہے۔

 بیان میں کہا گیا کہ ایک دوسرے کے لیے گہری محبت کے باوجودجوڑے نے محسوس کیا کہ تلخی اور مشکلات کے باعث ان کے درمیان ایک ایسا فاصلہ پیدا ہو گیا ہے جسے اس وقت دونوں فریق ختم کرنے سے قاصر ہیں۔

سائرہ نے مداحوں سے درخواست کی کہ وہ اس مشکل وقت میں ان کی پرائیویسی اور جذبات کا احترام کریں،بھارتی میڈیا کے مطابق اے آر رحمان نے 12 مارچ 1995 کو سائرہ بانو سے شادی کی تھی، جوڑے کے3بچے ہیں۔

یہ بھی پڑھیں: ناکامیوں پر کئی بار باتھ روم میں جا کر رویا  ،شاہ رخ خان کا انکشاف