انڈین بورڈ کا پاکستان آنے سے انکار، پی سی بی کا ایشین کرکٹ کونسل سے رابطہ

(24 نیوز) بھارت کا کھیل سے پھر کھلواڑ، انڈین کرکٹ بورڈ کے ایشیا کپ کھیلنے کیلئے پاکستان آنے سے انکار کے معاملے پر پی سی بی نے ایشین کرکٹ کونسل سے رابطہ کرلیا۔

اے سی سی کو انڈین بورڈ سے وضاحت طلب کرنے کیلئے لیٹر لکھ دیا گیا۔ پی سی بی نے ایشین کرکٹ کونسل کو لکھے گئے خط میں بھارتی رویے پر احتجاج کیا۔

پی سی بی کی جانب سے لکھے گئے خط میں کہا گیا کہ اے سی سی کے صدر جے شاہ سے بیان پر وضاحت طلب کریں، جے شاہ وضاحت دیں ایشیا کپ کو تنہا نیوٹرل ویونیو پر منتقل کرنے کا بیان کیوں دیا ؟ یہ معاملہ ایشین کرکٹ کونسل کے پلیٹ فارم پر طے ہونے والا ہے۔

ذرائع کے مطابق خط میں پی سی بی نے اگلے برس بھارت میں ہونے والے ورلڈ کپ کے بائیکاٹ کی دھمکی دی ہے۔ اگر بھارت نے اکیلے ہی فیصلے کرنے ہیں تو کونسل سے پاکستان علیحدگی اختیار کر سکتا ہے۔