(24 نیوز)وفاقی وزیر داخلہ محسن نقوی نے سعودی عرب کے سفیر نواف بن سعید احمد المالکی سے ملاقات میں کہا کہ سعودی شہریوں کو پاکستان آنے کے لیے کسی ویزا کی ضرورت نہیں، وہ جب چاہے پاکستان آسکتے ہیں۔
محسن نقوی نے اسلام آباد میں نواف بن سعید احمدالمالکی سے ملاقات کی، ڈپلومیٹک انکلیو سعودی سفارتخانے آمد پر سعودی عرب کے سفیر نے وزیر داخلہ محسن نقوی کا خیر مقدم کیا۔
ملاقات کے دوران باہمی دلچسپی کے امور، دوطرفہ تعلقات کے فروغ اور باہمی تعاون بڑھانے کے حوالے سے تبادلہ خیال کیا گیا، وفاقی وزیر داخلہ نے معاشی و سماجی شعبوں میں پاکستان کا بھرپور ساتھ دینے پر سعودی حکومت کا شکریہ ادا کرتے ہوئے کہا کہ پاک گلف تعاون کونسل انسداد منشیات کانفرنس میں سعودی عرب کے اعلی سطح کے وفد کی شرکت پر مشکور ہیں۔
ان کا کہنا تھا کہ انسداد منشیات اورانسانی اسمگلنگ کی روک تھام کیلئے سعودی عرب کے ساتھ تعاون بڑھانا چاہتے ہیں۔محسن نقوی نے بتایا کہ بھکاریوں اور غیرقانونی امیگریشن روکنے کے لئے پاسپورٹ کے حصول کے لیے نئی شرائط عائد کی جا رہی ہیں تاہم سعودی شہریوں کے لئے پاکستان آنے پر کوئی ویزا نہیں، وہ جب چاہے پاکستان آسکتے ہیں۔
وزیر داخلہ نے منشیات کیس میں ملوث بے گناہ خاندان کی رہائی کے لیے بھر پور تعاون پر بھی سعودی حکومت اور سفیر کا شکریہ ادا کرتے ہوئے کہا کہ بے گناہ خاندان کی رہائی و وطن واپسی کے لیے سعودی عرب نے بہت ساتھ دیا۔مزید کہا کہ سعودی عرب حکومت کے تعاون کی بدولت ہی خاندان کے 5 افراد کو رہائی ملی اور وطن واپس آئے۔
اس موقع پر سعودی سفیرکا کہنا تھا کہ پاکستان کےساتھ انتہائی قریبی تعلقات ہیں جس کو مزید فروغ دینا چاہتے ہیں۔
یہ بھی پڑھیں:آرمی چیف نے اوورسیز پاکستانیوں کا دیرینہ مطالبہ پورا کر دیا:چودھری شجاعت