(ویب ڈیسک) اتوار کو قطر میں فیفا ورلڈ کپ کے فائنل میں ارجنٹینا کے ہاتھوں شکست کے بعد فرانس کے اسٹار فٹبالر نے ریٹائرمنٹ کا اعلان کردیا۔
ارجنٹینا کے خلاف ٹیم کی شکست کے بعد ورلڈ کپ سے قبل انجری کا شکار ہونے والے فرانس کے اسٹرائیکر کریم بینزیما نے انٹرنیشنل فٹبال سے ریٹائرمنٹ کا اعلان کردیا۔
کریم بینزیما ورلڈ کپ کے پہلے میچ سے قبل ہی ٹریننگ کے دوران انجری کا شکار ہوکر فیفا ورلڈ کپ 2022ء سے باہر ہوگئے تھے۔
فرانس کی ارجنٹینا کے ہاتھوں شکست کے بعد سوموار کو سوشل میڈیا پر ایک پوسٹ کرتے ہوئے بینزیما نے ریٹائرمنٹ کا اعلان کیا اور کہا کہ ’میں نے کوشش بھی کی اور غلطیاں بھی، جو مجھے وہاں لے آئیں جہاں میں آج ہوں اور مجھے اس پر فخر ہے‘۔
یہ بھی پڑھیے: ارجنٹینا کے دارالحکومت بیونس آئرس میں لاکھوں افراد کا سڑکوں پر جشن
بینزیما 2014ء کے ورلڈ کپ میں فرانس کی جانب سے سب سے زیادہ اسکور کرنے والے کھلاڑی تھے۔
انہوں نے فرانس کی جانب سے97 انٹرنیشنل میچز میں 37 گولز کیے۔
اس کے علاوہ بینزیما کو 2022ء میں فٹبال کلب ریئل میڈرڈ کو چیمئینز لیگ اور لا لیگا جتوانے پر پلیئر آف دی ایئر قرار دیا گیا اور انہیں بیلون ڈی اور ( گولڈن بال) کے ایوارڈ سے بھی نوازا گیا۔