ووٹ الف کو دیتے ہیں حکومت میں ب آ جاتا ہے: پیر پگاڑا

(24 نیوز) حر جماعت کے روحانی پیشوا اور مسلم لیگ فنکشنل کے سربراہ پیر پگاڑا نے کہا ہے کہ ہم ووٹ الف کو دیتے ہیں اور حکومت میں ب آ جاتا ہے۔

مسلم لیگ فنکشنل کے سربراہ پیر پگاڑا نے پریس کانفرنس کرتے ہوئے کہا ہے کہ اب یہ حکومت بنائی ہے جو چل ہی نہیں رہی بلکہ جھوٹ پر قائم ہے، ملک میں روزگار نہیں دے سکتے تو عزت ہی دے دیں،پیر پگاڑانے کہا ہے کہ حکومت میں بیٹھے ہوئے لوگ ایک دوسرے کے ساتھ جھوٹ بول رہے ہیں، آپ کے اور میرے ووٹ سے نہ حکومت بنتی ہے اور نہ ٹوٹتی ہے، عزت دار لوگ سیاست سے باہر ہو جائیں گے تو پھر ٹھیکیدار ملک چلائیں گے، ہمیں ملک کے لیے سوچنا ہوگا، سیلاب ہو یا دیگر آفات مدد کے لیے فوج ہی آتی ہے۔

مسلم لیگ فنکشنل کے سربراہ نے کہا کہ سب قانون کے مطابق چلیں گے تو بہتر ہو گا ورنہ پھر گاڑی اسی طرح چلے گی، ہمیں تو پتہ تھا کہ 70 سال سے الیکشن کیسے ہو رہے ہیں، اس بار عالمی سطح پر بھی پتہ چل گیا کہ الیکشن کیسے ہوتے ہیں،پیر پگاڑا کا کہنا ہے کہ پانی کا مسئلہ ہے جہاں بھی گیا تو لوگوں کا حال دیکھ کر افسوس ہوا، ایسے بھی علاقے ہیں جہاں پینے اور نہانے کے لیے پانی نہیں ہے، اگر صدر زرداری نے کینالز کے لیے این او سی دیا ہے تو ہم تو کچھ نہیں کر سکتے۔

فنکشنل لیگ کے سربراہ نے کہا کہ سیلاب میں سب پریشان ہوتے ہیں کہ بند نہ ٹوٹ جائے جبکہ سیلاب کے سیزن میں لوگ پانی کے لیے لڑ رہے تھے بعد میں کیا حال ہو گا؟ سندھ کو پانی ملے گا تو بلوچستان کی طرف آئے گا۔

اسے بھی پڑھیں: