شوہر کی وفات کے بعدڈپریشن سے نکلنے کیلیے ماہر ذہنی امراض سے مدد لی:شگفتہ اعجاز
یحییٰ کے بغیر جینا آئے گا تو نہیں مگر بچوں اورگھرکےلیے اس غم سے نکلنے کی کوشش کروں گی
Stay tuned with 24 News HD Android App
(ویب ڈیسک) سینئر اداکارہ شگفتہ اعجاز نے اپنے شوہر یحییٰ صدیقی کے انتقال کے بعد اپنی ذہنی صحت اور پیش آنے والی مشکلات پرپہلی بارلب کشائی کی ہے۔
معروف اداکارہ نے اپنے شوہر کے انتقال کے 5 ماہ بعد یوٹیوب پر وی لاگ شیئر کیا ہے جس میں انہوں نے اپنے مداحوں کے ساتھ شوہر کے انتقال سے قبل کے معاملات اور بعد میں پیش آنے والی ذہنی مشکلات اور مستقبل سے متعلق گفتگو کی ہے۔
اداکارہ نے کہا کہ یحییٰ صدیقی کے جانے کے بعد ذہنی صحت متاثر ہوئی، مجھے چیزوں کو قبول کرنے میں وقت لگا، میں نے اپنا وقت لیا اوراب اپنے یوٹیوب چینل کے صارفین سے بات کرنے کے بارے میں سوچا ہے۔
اپنے مرحوم شوہر کو یاد کرتے ہوئےشگفتہ اعجازنے بتایا کہ یحییٰ میرے ہر کام،اورہر خواہش میں حوصلہ افزائی کرتے تھے، برے وقت میں یحییٰ کا کہنا تھا کہ دیکھ لیں گے، کوئی نہ کوئی راستہ ڈھونڈ لیں گے، وہ مجھے پریشان نہیں ہونے دیتے تھے، یحییٰ نے مجھے ہر جگہ سپورٹ کیا۔
شگفتہ اعجاز نے کہا کہ کہا جاتا ہے ہر کامیاب مرد کے پیچھے ایک عورت کا ہاتھ ہوتا ہے، میرا کہنا ہے کہ ہر کامیاب عورت کے پیچھے بھی اس کے شوہر کا ہاتھ اور سپورٹ ہوتی ہے۔
شگفتہ اعجاز نے کہا کہ شوہر کے جانے کے بعد کمرے میں بند ہو گئی تھی، اس دوران اپنی بیٹیوں کے زیادہ قریب ہو گئی ہوں، میرے بچے میرا خیال کرتے ہیں، میری پرواہ کرتے ہیں، یحییٰ کے جانے کے بعد میرا کچھ بھی کرنے کا دل نہیں چاہتا تھا، میں نے ان 5 ماہ میں صرف ایک کام دل سے کیا ہے، وہ میں اپنے آئندہ وی لاگ میں شیئر کروں گی۔
معروف اداکارہ نے کہا کہ میں یحییٰ کے بعد بہت ڈپریشن میں چلی گئی تھی، ذہنی امراض کے ڈاکٹر سے اپنی ذہنی صحت کی بہتری کے لیے سیشن لیے ہیں، ڈاکٹر نے مجھے بتایا ہے کہ ہمسفر کے بچھڑنے کا صدمہ کم از کم 6 ماہ تک رہتا ہے،مجھے اب احساس ہوتا ہے کہ یحییٰ میرا سپورٹ سسٹم تھے۔
اپنے وی لاگ میں شگفتہ اعجاز نے اپنے شوہر یحییٰ کے آخری دنوں پربھی تفصیل سے بات کرتے ہوئے کہا کہ یحییٰ کی بہت دیکھ بھال کی، کوئی بے احتیاطی نہیں برتی، وہ آخری دنوں میں بہت بے چین ہو گئے تھے، یحییٰ اپنے آخری دنوں میں چاہتے تھے کہ میں کہیں نہ جاؤں، بس ہر وقت ان کے پاس رہوں۔
یہ بھی پڑھیں:ہانیہ عامر بالی ووڈ کی فلم میں اداکاری کے جوہر دکھانے کیلئے تیار
انہوں نے مزید کہا کہ یحییٰ کے بغیر جینا آئے گا تو نہیں مگر اب بچے ہیں، ان کی زندگیاں ہیں، گھر ہے تو اس غم سے نکلنے کی کوشش کروں گی، میں نے اپنے شوہر کی وفات کا بہت غم منا لیا ہے، عدت گزار لی ہے، اتنا غم منایا ہے کہ اب محسوس ہوتا ہے کہ جیسے وہ میرے ساتھ ہیں۔
اداکارہ کے وی لاگ کے مطابق انہوں نے یہ وی لاگ 14 فروری کو سحری کے وقت ریکارڈ کیا تھا۔