عمران خان کیخلاف درج مقدمات میں عبوری ضمانت کی درخواست خارج
Stay tuned with 24 News HD Android App
(24نیوز)ہائی کورٹ نے بانی پی ٹی آئی عمران خان کیخلاف درج مقدمات میں عبوری ضمانت کی استدعا خارج کر دی۔
لاہور ہائی کورٹ میں بانی پی ٹی آئی عمران خان کے خلاف درج مقدمات کی تفصیلات کیلئے دائر درخواست پر سماعت ہوئی، عمران خان کی بہن نورین نیازی کی درخواست پر سماعت جسٹس فاروق حیدر نے کی،درخواست گزار کے وکیل نے مؤقف اختیار کیا کہ بانی پی ٹی آئی کو تمام مقدمات میں عبوری ضمانت فراہم کی جائے۔
جسٹس فاروق حیدر نے ریمارکس دیئے کہ میرا نقطہ نظر یہ نہیں ہے، میں ضمانت نہیں دے سکتا، میرے نزدیک ملزم کا ضمانت قبل از گرفتاری میں عدالت کے روبرو پیش ہونا ضروری ہے، اگر مقدمات چھپائے گئے ہوئے تو متعلقہ ڈی پی او کے خلاف توہین عدالت کی کارروائی کریں گے،دوران سماعت محکمہ داخلہ پنجاب اور وفاقی حکومت کی جانب سے بانی پی ٹی آئی عمران خان پر درج مقدمات کی رپورٹس عدالت میں پیش کی گئیں۔
رپورٹ کے مطابق محکمہ داخلہ پنجاب کی جانب سے بانی پی ٹی آئی کے خلاف کوئی بھی مقدمہ درج نہیں ہے، وفاقی حکومت کے وکیل نے عدالت میں بتایا کہ بانی پی ٹی آئی کے خلاف اسلام آباد پولیس نے 62 کیسز درج کر رکھے ہیں۔
بعد ازاں عدالت نے تمام رپورٹس کی روشنی میں بانی پی ٹی آئی عمران خان کی بہن نورین نیازی کی درخواست نمٹا دی۔