وزیراعظم سےیو اے ای کے وزیرخارجہ کی ملاقات،دوطرفہ تعلقات،علاقائی و عالمی صورتحال پرگفتگو

(اویس کیانی )وزیراعظم شہباز سے متحدہ عرب امارات(یو اے ای) کے نائب وزیر اعظم و وزیر خارجہ  شیخ عبداللہ بن زاید آل نھیان نے ملاقات کی جس میں دوطرفہ تعلقات کے علاوہ علاقائی صورتحال اور عالمی پیش رفت پر بھی تبادلہ خیال کیا گیا۔

 تفصیلات کے مطابق ملاقات وزیراعظم ہاؤس اسلام آباد میں ہوئی جس دوران وزیراعظم نے پاکستان اور متحدہ عرب امارات کے درمیان مشترکہ تاریخ، باہمی احترام کے ساتھ ساتھ مضبوط ثقافتی اور اقتصادی روابط پر مبنی برادرانہ تعلقات کو مزید مستحکم بنانے کے عزم کا اعادہ کیا، انہوں نے متحدہ عرب امارات کے صدر وابوظہبی کے حکمران  شیخ محمد بن زاید النہیان  کے لئے نیک خواہشات کا اظہار کیا  اور مختلف شعبوں میں متحدہ عرب امارات کی پاکستان کے لیے مسلسل حمایت کو سراہا۔

ملاقات میں  دونوں ممالک کے درمیان دوطرفہ تعاون کی مثبت رفتار پر اطمینان کا اظہار کرتے ہوئے وزیراعظم نے تجارت، سرمایہ کاری، توانائی اور عوام سے عوام کے روابط میں تعاون بڑھانے کی ضرورت پر زور دیا،انہوں نے پاکستان اور متحدہ عرب امارات کے درمیان بہترین سیاسی تعلقات کو باہمی طور پر فائدہ مند اقتصادی شراکت داری تک بڑھانے کی پاکستان کی خواہش کا اعادہ کیا۔

 اس موقع پر  شیخ عبداللہ بن زید النہیان نے متحدہ عرب امارات میں پاکستانی کمیونٹی کے تعاون کو سراہا اور دوطرفہ تعلقات کو مزید گہرا کرنے اور تعاون کی نئی راہیں تلاش کرنے کے یو اے ای کے عزم کا اعادہ کیا۔ 

یہ بھی پڑھیں: پاکستان کی ٹیکسٹائل برآمدات بلند ترین سطح پر پہنچ گئی