( 24نیوز ) پنجاب کے تعلیمی بورڈز نے 9ویں اور 10ویں جماعت کے طلباء کیلئے تعلیمی سال 2025 سے 2027 تک کے لیے نظرثانی شدہ رجسٹریشن فیس کا شیڈول جاری کر دیا ہے۔
نئی فیس کے مطابق، کل رجسٹریشن فیس بڑھا کر 2,910 روپے کر دی گئی ہے جو کہ پہلے کے مقابلے میں زیادہ ہے،رجسٹریشن فیس 1,100 روپے ، پراسیسنگ فیس: 630 روپے، بورڈ ڈیولپمنٹ فنڈ: 300 روپے، سکالرشپ فیس: 180 روپے، اسپورٹس فیس: 200 روپے کر دی گئی ہے ۔
اس کے علاوہ، سکولز اپنی جانب سے 500 روپے الگ سے وصول کریں گے۔ مزید برآں، اسکول دیگر خدمات کے نام پر 300 سے 500 روپے اضافی بھی لے سکتے ہیں۔ نئی فیس سرکاری اور نجی دونوں اداروں پر لاگو ہوگی،رجسٹریشن کا عمل 29 مئی 2025 سے بغیر لیٹ فیس کے شروع ہوگا، تاہم 30 مئی سے 13 جون کے درمیان رجسٹریشن کرانے والے طلباء کو 600 روپے لیٹ فیس ادا کرنا ہوگی۔
رجسٹریشن کے لیے صرف وہی طلباء اہل ہوں گے جن کی عمر یکم اگست 2025 تک کم از کم 11 سال 2 ماہ ہو۔ رجسٹریشن کا عمل آن لائن مکمل ہوگا تاہم اسکولز کو رجسٹریشن دستاویزات کی ہارڈ کاپی متعلقہ بورڈ آفس میں بھی جمع کروانا ہوگی۔
طلباء کو رجسٹریشن کے دوران ب فارم (B-Form) بھی فراہم کرنا ہوگا۔
یہ بھی پڑھیں : ’سمارٹ فونز فار آل‘پالیسی ! عوام کیلئے بڑی خوشخبری آگئی