بھارت میں احتجاج کرنیوالے کسانوں کو مفت پیزا ملے گا

(24 نیوز)بھارتی دارالحکومت نئی دہلی میں احتجاج کیلئے ملک بھر سے آنے والے کسانوں کیلئے ایک تنظیم کی جانب سے پیزا لنگر کا اہتمام کیا گیاہے۔

تفصیلات کے مطابق زرعی قوانین کو منسوخ کرنے کے مطالبے کے ساتھ دہلی سرحد پر موجود احتجاج کرنے والے کسانوں کے لئے آج پیزا لنگر کا دوبارہ اہتمام کیا گیا، دہلی کے سنگھو بارڈر پر پہنچنے والے موہالی کے نوجوانوں کی ایک ٹیم نے پیزا لنگر کا اہتمام کیا تھا۔
غیر ملکی ذرائع کے مطابق پنجاب میں موہالی کے علاقے لالرو میں گروکرنت سنگھ کی پیزا کی دکان ہے، نوجوانوں کا کہنا ہے کہ اس سے قبل جب مظاہرے کی جگہ پر پیزا کا لنگر لگا تھا، تب کچھ میڈیا چینلز نے منفی خبریں چلائیں اور کہا کہ کسان احتجاج کے مقام پر پیزا سے لطف اندوز ہو رہے ہیں۔
 خبر وں سے  ناراض ہوکر نوجوانوں نے ایک بار پھر پیزا کا لنگر لگانے کا فیصلہ کیا، ٹیم میں شامل ایک اور نوجوان کا کہنا تھا کہ جو کسان پورے ملک کو کھانا کھلاسکتا ہے تو وہ کسان خود پیزا کیوں نہیں کھا سکتا؟ یہ پیزا لنگر ان لوگوں کے منہ پر طمانچہ ہے جو یہ سمجھتے ہیں کہ کسان پیزا نہیں کھا سکتے۔
تنظیم کے ایک اور نوجوان بلدیپ سنگھ کا کہنا تھا کہ ہر روز وہ تقریباً دس ہزار لوگوں کو پیزا کھلا رہا ہے۔ کھانے والوں کے ہجوم میں ہر عمر کے افراد شامل ہیں اور کسانوں کے علاوہ مقامی لوگ اور بچے بھی پیزا کے لنگر سے لطف اندوز ہو رہے ہیں۔