(24 نیوز)ملک کے بالائی اور میدانی علاقے سردی کی لپیٹ میں آگئے، کوئٹہ سمیت بلوچستان کے شمالی علاقوں میں درجہ حرارت منفی ہونے کے بعد تالاب، جوہڑ اور سڑکوں پر پڑا پانی بھی جم گیا۔
محکمہ موسمیات کے مطابق ملک کے بیشتر علاقوں میں موسم سرد اور خشک جبکہ بالائی علاقوں میں شدید سرد اور مطلع ابر آلود رہنے کا امکان ہے، رات کے اوقات میں پنجاب، بالائی سندھ اور خیبر پختونخوا کے میدانی علا قوں میں دُھند چھائے رہنے کی توقع ہے۔
قلات میں درجہ حرارت منفی 7، کوئٹہ میں منفی 6 ڈگری ریکارڈ کیا گیا جبکہ خیبرپختونخوا کے مالم جبہ، چترال اور دیر کے علاوہ مری، راولاکوٹ اور گلگت بلتستان کے کئی اضلاع میں بھی پارا نقطۂ انجماد سے نیچے گرگیا۔
محکمہ موسمیات کے مطابق اسلام آباد اور پشاور میں کم سے کم درجہ حرارت منفی ایک، لاہور میں چار اور کراچی میں 12 ڈگری ریکارڈ کیا گیا,محکمہ موسمیات نے لاہور میں 23 دسمبر کو بارش کی پیش گوئی کردی ہے۔
محکمہ موسمیات کے مطابق کراچی میں آج بھی تیز ہوائیں جاری رہیں گی جبکہ سردی بڑھنے کا امکان ہے۔
اسلام آباد اور گرد و نواح میں موسم سرد اور خشک جبکہ شام/رات کے اوقات میں مطلع جزوی ابر آلود رہنے کا امکان ہے تاہم صبح کے اوقات میں کہرا پڑنے کی توقع ہے۔
یہ بھی پڑھیں : مکہ مکرمہ اور مدینہ منورہ میں موسم سرما کی بارش
بلوچستان کے بیشتر اضلاع میں موسم شدید سرد اورخشک رہے گا تاہم قلعہ عبداللہ، پشین، کوئٹہ، زیارت، قلعہ سیف اللہ اور ژوب میں مطلع جزوی ابر آلود رہنے کا امکان ہے۔
پنجاب کے بیشتر اضلاع میں موسم سرد اورخشک جبکہ مری، گلیات اور گرد و نواح میں موسم شدید سرد رہنے کا امکان ہے۔ تا ہم رات میں خطہ پوٹھوہار میں مطلع جزوی ابر آلود رہنے کی توقع ہے ، صبح اور رات کے اوقات میں سیالکوٹ، نارووال، گوجرانوالہ، لاہور، شیخوپورہ، ساہیوال، فیصل آباد، قصور، اوکاڑہ، ملتان، بہاولپور، رحیم یار خان، ڈی جی خان، بہاولنگر اور گرد و نواح میں دھند چھائے رہنے کی توقع ہے جبکہ صبح کے اوقات میں خطہ پوٹھوہار اور چند میدانی علاقوں میں کہرا پڑنے کی توقع ہے۔
سندھ کے بیشتر اضلاع میں موسم سرد اور خشک رہنے کا امکان ہے تاہم رات کے اوقات میں سکھر، شکارپور، کشمور، خیر پور اور گرد و نواح میں دھند چھائے رہنے کی توقع ہے۔
خیبرپختونخوا کے بیشتر اضلاع میں موسم سرد اورخشک جبکہ پہاڑی علاقوں میں شدید سرد رہے گا تاہم چترال، دیر، سوات، ملاکنڈ، بونیر، مانسہرہ، بٹگرام، کوہستان، باجوڑ، مہمند، خیبر، کرم، پشاور، مردان اور صوابی میں مطلع جزوی ابر آلود رہنے کا امکان ظاہر کیا گیا ہے۔ کشمیر اور گلگت بلتستان میں موسم شدید سرد اور مطلع ابر آلود رہنے کا امکان ہے۔