انتخابات میں مبینہ دھاندلی، سندھ میں پی ٹی آئی، جی ڈی اے اور جماعت اسلامی ایک پلیٹ فارم پر

(فہیم صدیقی) گرینڈ ڈیموکریٹک الائنس (جی ڈی اے)، پاکستان تحریک انصاف اور جماعت اسلامی نے عام انتخابات میں مبینہ دھاندلی کیخلاف مشترکہ جدوجہد کرنے کا اعلان کردیا ہے۔

سید صدرالدین شاہ راشدی سے پی ٹی آئی سندھ کے صدر حلیم عادل شیخ اور جماعت اسلامی کراچی کے امیر حافظ نعیم الرحمٰن نے ان کی رہائش گاہ پر ملاقات کرتے ہوئے مشترکہ جدوجہد کرنے کا اعلان کیا۔

جی ڈی اے کے سیکریٹری اطلاعات عبدالرحیم نے بتایا کہ ملاقات میں موجودہ سیاسی صورتحال اور مبینہ دھاندلی پر باہمی تعاون کے حوالے سے غور کیا گیا، سید صدر الدین شاھ راشدی نے دیگر رہنماؤں کو جی ڈی اے کے 23 فروری کو ہونے والے اجلاس میں شرکت کی دعوت دی۔

یہ بھی پڑھیے: پنجاب میں حکومت سازی کیلئے اجلاس23 فروری کو متوقع

ان کا کہنا تھا کہ ملاقات میں اس بات پر غور ہوا کہ اپوزیشن کی سخت گیر تحریک کی وجہ سے حکومت اور الیکشن کمیشن بوکھلاہٹ کا شکار ہے اور اس بات کا امکان ہے کہ سندھ اسمبلی کا اجلاس برائے حلف برداری کا اعلان اچانک کردیا جائے گا۔

   انہوں نے کہا کہ اس صورت میں عوام اور تمام جماعتوں کے کارکنان اس دن سندھ بھر میں سخت احتجاج کریں گے جس پر اجلاس میں شریک رہنماؤں نے اتفاق کیا۔

سردار عبدالرحیم نے مزید بتایا کہ 23 فروری کے اجلاس میں اس حوالے سے غور کے بعد حتمی اعلان کیا جائے گا۔