دبئی کرکٹ  سٹیڈیم میں میچ دیکھنے والوں کیلئے سخت قواعدو ضوابط جاری

( 24 نیوز )دبئی میں آئی سی سی چیمپئنز ٹرافی کی گہماگہمی اپنے عروج پر ہے، مگر  سٹیڈیم میں داخل ہونے والے شائقین کو سخت قواعد و ضوابط پر عمل کرنا ہوگا۔

 دبئی کرکٹ سٹیڈیم کی انتظامیہ نے ان قوانین کو عوامی مقامات، ٹکٹ کاوئنٹرز، اور پارکنگ ایریاز میں نمایاں طور پر آویزاں کیا ہے تاکہ شائقین کسی قسم کی خلاف ورزی سے باز رہیں۔

سیاسی نعرے بازی اور بینرز پر مکمل پابندی

کرکٹ کو صرف ایک کھیل کے طور پر دیکھا جائے، کسی بھی قسم کی سیاسی نعرے بازی یا سیاسی بینرز اور پوسٹرز لانے کی اجازت نہیں ہوگی۔ اسٹیڈیم کے باہر واضح ہدایات لکھی گئی ہیں: ’سیاسی خیالات، نعرے، پوسٹرز اور بینرز گھر پر چھوڑ آئیں!‘

خطرناک اشیاء کی سخت ممانعت

حکام نے حفاظتی اقدامات کو یقینی بنانے کے لیے متعدد اشیاء پر پابندی عائد کردی ہے، جن میں ہتھیار، چاقو، پستول، اور کسی بھی قسم کا دھماکہ خیز مواد شامل ہے۔ کچھ شائقین نے اس حوالے سے مذاق میں کہا، ’بم تو چھوڑیں، کیا ہمیں اپنے چیمپئن ’سرفراز‘ اسٹائل میں پانی کی بوتل بھی نہیں لانے دیں گے؟‘

 شائقین کو ہدایت دی گئی ہے کہ وہ کھانے پینے کی اشیاء اپنے ساتھ نہ لائیں، بلکہ اسٹیڈیم میں لگائے گئے فوڈ اسٹالز سے خریداری کریں۔ البتہ، چھوٹے بچوں کے لیے دودھ اور دیگر ضروری اشیاء لانے کی اجازت ہوگی تاکہ والدین کو پریشانی کا سامنا نہ کرنا پڑے۔

پالتو جانوروں کا داخلہ ممنوع

انتظامیہ نے سختی سے ہدایت دی ہے کہ کوئی بھی شائق اپنے کتے، بلی یا خرگوش کو اسٹیڈیم نہ لائے۔ ایک شائق نے مزاحیہ انداز میں تبصرہ کیا، ’میرا طوطا کرکٹ کا دیوانہ ہے، کیا میں اسے نہیں لا سکتا؟‘

 سکیٹ بورڈ اور سائیکل پر پابندی

کچھ شائقین ٹریفک کی بھیڑ سے بچنے کے لیے  سکیٹ بورڈز یا سائیکلوں کا استعمال کرتے ہیں، مگر انتظامیہ نے واضح کردیا ہے کہ ان چیزوں کو اسٹیڈیم کے اندر لے جانے کی اجازت نہیں ہوگی۔

 فلیش فوٹوگرافی اور ریکارڈنگ منع

میچ کے دوران فلیش فوٹوگرافی اور ویڈیو ریکارڈنگ کی اجازت نہیں ہوگی، کیونکہ یہ نہ صرف کھلاڑیوں کی توجہ منتشر کرسکتی ہے بلکہ کاپی رائٹ قوانین کی خلاف ورزی بھی ہوسکتی ہے۔ شائقین کو ہدایت دی گئی ہے کہ وہ محض کھیل کا لطف اٹھائیں اور ان قوانین پر عمل کریں۔

 زہریلے اور غیر قانونی مواد پر سخت پابندی

اسٹیڈیم میں کسی بھی قسم کے زہریلے یا غیر قانونی مواد، بشمول الکوحل، شیشے کی بوتلیں، اور ممنوعہ کیمیکل، لانے کی اجازت نہیں ہوگی۔ اس کے علاوہ، کرکٹ کے کھیل کو شفاف رکھنے کے لیے ریڈیو کمیونیکیشن ڈیوائسز پر بھی پابندی لگا دی گئی ہے تاکہ اسٹیڈیم میں نصب انٹرنیٹ اور کمیونیکیشن سسٹم متاثر نہ ہو۔

انتظامیہ کی اپیل

دبئی میں کرکٹ منتظمین نے شائقین سے گزارش کی ہے کہ وہ کھیل سے لطف اندوز ہوں اور ان تمام ضوابط پر عمل کریں تاکہ ایک محفوظ اور خوشگوار ماحول قائم رکھا جا سکے۔