بھارت،سوشل میڈیا پلیٹ فارم ایکس کو ہلاکتوں کی ویڈیو285سوشل میڈیا لنک سےہٹانےکی ہدایت

(ویب ڈیسک) بھارت کی وزارت ریلوے نے سوشل میڈیا پلیٹ فارم ایکس کو ہدایت دی ہے کہ وہ 15 فروری کو نئی دہلی ریلوے اسٹیشن پرمچی بھگدڑ سے ہونے والی ہلاکتوں کی ویڈیو پر مشتمل 285 سوشل میڈیا لنک کو ہٹا دے،اس بھگدڑ میں 18 افراد ہلاک ہوئے تھے۔
 بھارتی ذرائع ابلاغ کے مطابق بھارتی وزارت ریلوے نے سوشل میڈیا پلیٹ فارم ایکس کو ہدایت دی ہے کہ وہ ۱۵؍ فروری کو نئی دہلی ریلوے اسٹیشن پرمچی بھگدڑ سے ہونے والی ہلاکتوں کی ویڈیو پر مشتمل285سوشل میڈیا لنک کو ہٹا دے،اس بھگدڑ میں 18 افراد ہلاک ہوئے تھے۔وزارت نے اخلاقیات اور ایکس کی مواد کی پالیسی کا حوالہ دیتے ہوئے 17 فروری کو یہ نوٹس جاری کیا اور اس حکم نامے پر عمل در آمد کرنے کیلئے36گھنٹوں کا وقت دیا۔نوٹس میں کہا گیا ہے کہ اس طرح کی ویڈیوز شیئر کرنے سے عوام میں بے چینی پھیل سکتی ہے اور خاص طور پر بھاری ٹریفک کے دوران ریلوے آپریشنز میں خلل پڑ سکتا ہے۔اس ہدایت میں متعدد اکاؤنٹس کو بھی نشانہ بنایا گیا ہے، جن میں بڑے خبر رساں ادارے بھی شامل ہیں۔نوٹس کے مطابق انتہائی حساس اور پریشان کن میڈیا رپورٹ سے متوفی کی بے حرمتی کا ارتکاب ہوتا ہے۔مزید یہ کہ یہ نہ صرف اخلاقی اصولوں کے خلاف ہے بلکہ’ ایکس‘ کے مواد کے تعلق سے پالیسی کی بھی خلاف ورزی ہے۔ کیونکہ اس قسم کے ویڈیو شئیر کرنے سے امن و امان کے غیر ضروری مسائل پیدا ہو سکتے ہیں۔

واضح رہے کہ گزشتہ ہفتے نئی دہلی ریلوے اسٹیشن پر کنبھ میلے میں جانے والے مسافروں کی زبر دست بھیڑ، اور ٹرینوں کی تاخیرکے سبب بھگدڑ مچ گئی تھی، جس میں 18 مسافر جاں بحق ہو گئے تھے، اس حادثے کے بعد وزیر ریلوے اشونی ویشنو چو طرفہ تنقیدوں کی زد میں آگئے تھے۔اور یہ پہلی بار نہیں ہے کہ بھارتی وزارت ریلوے نے اس قسم کے اختیارات کا استعمال کیا ۔ اس سے قبل بھی جنوری میں یو ٹیوب اور انسٹاگرام کو بھی اسی طرح کا نوٹس جاری کیا گیا تھا، جس میں گمراہ کن اور اشتعال انگیز معلومات پر مبنی مواد کو ہٹانے کی درخواست کی گئی تھی، جو امن عامہ میں خلل ڈال سکتی ہے۔ 

یہ بھی پڑھیں:میٹرک کے سٹوڈنٹس ہوشیار،امتحانات کہیں عید سے پہلے کہیں بعد اور کہیں فیصلہ زیر غور