عوام کو مفت ویکسین ملے گی،سب کو فراہمی آسان نہیں، ڈاکٹر فیصل

(24نیوز) وزیر اعظم کے معاون خصوصی صحت ڈاکٹر فیصل سلطان نے کہا ہے کہ پاکستان کی20 فیصد تک عوام کو مفت ویکسین ملے گی لیکن ملک کی تمام آبادی کیلئے ویکسین کی فراہمی آسان نہیں ہوگی۔

تفصیلات کے مطابق اسلام آباد میں میڈیا بریفنگ کے دوران ڈاکٹر فیصل سلطان نے کہا ہے کہ ڈریپ نے دو کورونا ویکسین کی منظوری دے دی ہے۔انہوں نے کہا کہ پہلے مرحلے میں فرنٹ لائن ہیلتھ ورکروں اور اس کے بعد دیگر طبی عملے اور 65 سال کی عمر کے افراد کو ویکسین کی خوارک دی جائیں گی۔اس کے بعد 60 سال کی عمر کے افراد اور پھر بتدریج 18 سال کی عمر تک کے افراد کو ویکسین کی خوراک فراہم کی جائیں گی یعنی ویکسین بچوں کو نہیں صرف بالغ افراد کو لگے گی۔پرائیوٹ سیکٹر یا صوبائی حکومت پر ویکسین کے حصول کے لئے کوئی پابندی نہیں ہے۔