(روزینہ علی) محکمہ موسمیات نے ملک کے بیشتر علاقوں میں بارش اور پہاڑوں پر مزید برفباری کی پیشگوئی کی ہے۔
آج رات موسم کی صورتحال کے حوالے سے محکمہ موسمیات کا کہنا ہے کہ ملک کے بیشتر علاقوں میں موسم سرد اور خشک رہنے تاہم بالائی خیبر پختونخوا ، کشمیر،گلگت بلتستان اور جنوب مغربی بلوچستان میں بارش اور پہا ڑوں پر برفباری کی توقع ہے۔
بدھ کے روزموسم کی صورتحال کے حوالے سے موسم کا حال بتانے والوں نےاسلام آباد اور گردونواح میں موسم سرد اور مطلع جزوی ابر آلود رہنے کا امکان ظاہر کیا ہے۔
محکمہ موسمیات نے خیبرپختونخوا کے بیشتر اضلاع میں موسم سرد اور مطلع جزوی ابر آلود رہنے کے علاوہ چترال، دیر، سوات، شانگلہ، کوہستان، مانسہرہ، بٹگرام، ایبٹ آباد اور وزیرستان میں چند مقامات پر ہلکی بارش اور ہلکی برفباری کا امکان ظاہر کیا ہے۔
پنجاب کے بیشتر اضلاع میں موسم سرد اور خشک رہنے تاہم مری گلیات اور گردونواح میں ہلکی بارش اور ہلکی برفباری ہو سکتی ہے جبکہ صبح /رات کے اوقات میں لاہور، شیخوپورہ، قصور ،ا وکاڑہ، ساہیوال ، سیالکوٹ، نارووال ،گوجرانوالہ، رحیم یار خان، خان پور، بہاولنگر، بہاولپور ، فیصل آباد اور گرد و نواح میں ہلکی سے درمیانی دھند چھاۓ رہنے کی توقع ہے۔
بلوچستان کے بیشتر اضلاع میں موسم سرد اور مطلع جزوی ابر آلود رہے گا تاہم کوئٹہ، زیارت، چمن، پشین، قلعہ عبداللہ، قلعہ سیف اللہ، ژوب، بارکھان اورچاغی میں تیز ہوائیں ،ہلکی بارش اور پہاڑوں پر ہلکی برفباری کا امکان ہے۔
اس کے علاوہ سندھ کے بیشتر اضلاع میں موسم سرد اورخشک رہنے جبکہ رات کے اوقات میں سکھر ، شہید بینظیر آباد،شکارپور، کشمور، دادو، لاڑکانہ، خیر پور، ٹنڈوجام اور گردونواح میں ہلکی سے درمیانی دھند پڑنے کی توقع ہے۔
کشمیر اور گلگت بلتستان میں بھی مطلع ابر آلود رہنے کے ساتھ بارش اوربرفباری کا امکان ہے۔
دوسری جانب آج ریکارڈکئے گئے کم سےکم درجہ حرارت: لہہ منفی 09،گوپس ، سکردو منفی05، ہنزہ، استور منفی 02 کلام منفی 01اور گلگت میں00 ڈگری سینٹی گریڈ ریکارڈ کیا گیا۔
یہ بھی پڑھیں: بادل جم کر برسیں گے،محکمہ موسمیات نے پیشگوئی کر دی