(اعجاز جمالی) پیپلزپارٹی کے چیئرمین بلاول بھٹو زرداری کی سربراہی میں سندھ پیپلز ہاؤسنگ سکیم کی کارکردگی سے متعلق اہم اجلاس منعقد کیا گیا، وزیراعلیٰ سندھ سید مراد علی شاہ اور چیف سیکریٹری بھی اجلاس میں شریک ہوئے۔
اجلاس کے دوران بلاول بھٹو زرداری کو بریفنگ دی گئی کہ اب تک 20 لاکھ سے زائد متاثرین کی تصدیق مکمل کی جا چکی ہے، 11 لاکھ 45 ہزار بینک اکاؤنٹس کھولے گئے، 10 لاکھ 20 ہزار افراد کو مالی معاونت فراہم کر دی گئی۔
بریفنگ میں بتایا گیا کہ 6 لاکھ 60 ہزار گھروں کی تعمیر بنیاد تک مکمل ہو چکی ہے، 4 لاکھ خاندان مکمل تیار شدہ گھروں میں منتقل ہو چکے ہیں۔
اجلاس میں بریفنگ دی گئی کہ سندھ حکومت نے سرکاری زمین پر 3 لاکھ 1 ہزار 442 خاندانوں کو رہائشی زمین الاٹ کرنے کا عمل بھی مکمل کر لیا ہے۔ ضلعی انتظامیہ کو ہدایت دی گئی ہے کہ دو ہفتوں کے اندر زمین کے مالکانہ حقوق کی تقسیم کا عمل شروع کیا جائے۔
گھروں کو مقامی ضروریات کے مطابق ڈیزائن کیا گیا ہے، جس میں باورچی خانہ، باتھ روم اور صحن جیسی سہولیات بھی شامل ہیں۔
اجلاس کی سربراہی کے دوران بلاول بھٹو زرداری نے کہا کہ سندھ پیپلز ہاؤسنگ کے منصوبے کی تیزی سے تکمیل خوش آئند ہے، منصوبے کو تکمیل سے لاکھوں بے گھر خاندانوں کو مستقل چھت میسر آئے گی۔
چیئرمین بلاول بھٹو زرداری نے کہا کہ پاکستان پیپلزپارٹی عوام کی خدمت کے لئے ہر دور میں اسی طرح کے غیرمعمولی اقدامات کرتی رہی ہے۔
یہ بھی پڑھیں :عمران خان کو رہا کیے بغیر سیاسی استحکام ممکن نہیں، وزیراعلیٰ کے پی