(احتشام کیانی) اسلام آباد ہائیکورٹ میں بانی پی ٹی آئی اور شاہ محمود قریشی کی سائفر سزا کے خلاف اپیلوں پر سماعت کے دوران ایف آئی پراسیکیوٹر نے تسلیم کر لیا کہ امریکا نے سائفر میں سابق وزیر اعظم عمران خان کو ہٹانے کاکہا تھا ۔
تفصیلات کے مطابق چیف جسٹس عامر فاروق اور جسٹس میاں گل حسن اورنگزیب نے عمران خان اور شاہ محمود قریشی کی سزاؤں کیخلاف اپیل پر سماعت کی ،ایف آئی اے پراسیکیوٹر حامد علی شاہ عدالت میں پیش ہوئے جن سے جسٹس میاں گل حسن اورنگزیب نے سوال کیا کہ سائفر میں کیا تھا جس معلومات سے ہیرا پھیری کی گئی؟ جسٹس میاں گل حسن اورنگزیب نے دوسرا سوال کیا کہ بانی پی ٹی آئی نے کہا کہ سائفر میں کہا گیا اگر انہیں نہ ہٹایا تو نتائج بھگتنے ہونگے، یہی سائفر کا متن تھا کہ بانی پی ٹی آئی کو نہ ہٹایا تو نتائج ہونگے؟ جسٹس میاں گل حسن اورنگزیب نے اپنے سوال پر زور دیتے ہوئے پھر سے پوچھا کہ کیا بانی پی ٹی آئی سچ بول رہے تھے؟ جس پر ایف آئی اے پراسیکیوٹر حامد علی شاہ نے جواب دیا کہ بالکل یہی میسج تھا بانی پی ٹی آئی خود تسلیم کر رہے ہیں۔
جسٹس گل حسن اورنگزیب نے کہا کہ آپ کہہ رہے ہیں کہ بانی پی ٹی آئی نے سائفر کا جو متن بتایا وہ درست تھا، اگر اس کی حکومت گرانے کا کہا گیا تو پھر اسے معلومات کیوں نہیں دینی چاہیے تھی؟ جس پر ایف آئی پراسیکیوٹر نے جواب دیا کہ کیونکہ یہ دستاویز کانفیڈینشل تھیں ۔
یہ بھی پڑھیں : پی ٹی آئی ترجمان رؤف حسن پر خواجہ سراوں کا تیز دھار آلے سے حملہ ، چہرہ زخمی