بالی وڈ فلموں کی پیشکش کی باتیں بتانے پرمجھے جھوٹا کہا گیا،عمران عباس

(ویب ڈیسک)معروف اداکار عمران عباس نے شکوہ کیا ہے کہ انہیں متعدد بالی وڈ فلموں میں کام کی پیشکش کی باتیں بتانے پر جھوٹا کہا گیا۔

عمران عباس نے حال ہی میں دیئے گئے ایک انٹرویو میں کہا کہ جب انہوں نے کہا تھا کہ انہیں "ہیرا منڈی"ویب سیریز میں کاسٹ کرنے کی بات ہوئی تھی تو انہیں جھوٹا کہا گیا لیکن بعد میں سنجے لیلیٰ بھنسالی نے خود کہا کہ انہوں نے عمران عباس سمیت دیگر پاکستانی فنکاروں کو کاسٹ کرنے کا سوچا تھا۔

عمران عباس نے کہا کہ انہوں نے مختلف انٹرویوز میں بتایا تھا کہ انہیں متعدد دیگربالی وڈ فلموں میں بھی کام کی پیشکش ہوئی، جن میں وہ کام نہیں کر سکے تو انہیں جھوٹا سمجھا گیا، ان پر تنقید کی گئی، ان کا مذاق اڑایا گیا۔

معروف اداکار کا کہنا تھا کہ  ہماری عوام اور صحافیوں نے بھارت کے ایسے صحافیوں کی بات پر یقین کرکے مجھے جھوٹا سمجھا جن پر بھارت میں پابندی ہے کیونکہ وہ جھوٹ بولتے ہیں۔

عمران عباس کا کہنا تھا کہ وہ گزشتہ 20 سال سے شوبز انڈسٹری کا حصہ ہیں اورمتعدد بھارتی فلموں میں کام بھی کر چکے ہیں،وہ کیوں کسی معاملے پر ٹی وی پر بیٹھ کر جھوٹ بولیں گے؟سنجے لیلیٰ بھنسالی، راجو ہیرانی اور دیگر فلمساز بڑی شخصیات ہیں، وہ ان کے نام پر کیسے اور کیوں جھوٹ بولیں گے؟

یہ بھی پڑھیں:نازیبا ویڈیوز کس نے وائرل کیں؟متھیرانے نیا انکشاف کردیا

عمران عباس نے واضح کیا کہ انہوں نے ہمیشہ یہ بات کی ہے کہ انہیں متعدد بالی وڈ فلموں میں کام کی پیش کش ہوئی جبکہ انہوں نے کبھی ایسا نہیں کہا کہ انہوں نے پیشکش کو مسترد کیا،انہیں جن فلموں میں کام کی پیش کش ہوئی، وہ ان میں کام کرنا چاہتے تھے لیکن حالات کی وجہ سے کام نہیں کر سکے، ایسا نہیں تھا کہ انہوں نے کام کرنے سے انکار کیا۔

انہوں نے کہا کہ ان کی بالی وڈ فلموں میں کام کی پیشکش کی باتوں کو گاؤں اور دیہات میں بیٹھے لوگوں نے بھی جھوٹ قرار دیاجس پر انہیں دکھ اور افسوس ہوا۔