(ویب ڈیسک) بالی ووڈ کی معروف اداکارہ کاجول جلد اپنی نئی فلم "مہارانی: کوئین آف کوئینز"میں ایکشن کرتے نظر آئیں گی، فلم کی شوٹنگ آخری مراحل میں ہے اور اکتوبر کے آخر تک اسے مکمل کریا جائے گا۔
تیلگو ڈائریکٹر چرن تیج اپلاپتی کی ہدایت کاری میں بننے والی اس فلم میں کاجول ایک طاقت ور کردار مایا کے روپ میں دکھائی دیں گی، جو دھاراوی کی جھگیوں سے اُبھر کر مہاراشٹر کی طاقت ور شخصیت بن جاتی ہیں۔
اس فلم کا ایک بڑا حصہ حیدرآباد میں شوٹ کیا گیا ہے، جہاں کاجول نے زبردست ایکشن مناظر کی عکس بندی کرائی ہے جس کے لیے خصوصی طورایک سیٹ لگایا گیا ہے، جس میں کاجول نے اسلحہ کا استعمال اور ہاتھوں سے لڑائی کی مہارت کا مظاہرہ کیا۔
فلم کے ایکشن مناظر کو پیٹر ہین نے ترتیب دیا ہے، جو "پشپا" اور "دیوارا" جیسی مشہور فلموں کے لیے مشہورہیں،فلم کے ایکشن مناظر کومزیددلچسپ بنانے کے لیے جرمن اسٹنٹ کوآرڈینیٹر فلورین ہوٹز کی خدمات بھی حاصل کی گئی ہیں جو"ہنگر گیمز" اور"جان وِک"جیسی عالمی شہرت یافتہ فلموں پر کام کر چکے ہیں۔
کاجول کی یہ فلم ہندی کے ساتھ ساتھ تیلگو، تامل، ملیالم اور کنڑ زبانوں میں بھی ڈب کی جا رہی ہے،فلم بینوں کو اس کی ریلیز کا شدت سے انتظار ہے کیونکہ کاجول کوپھر سے ایکشن میں دیکھناچاہتے ہیں۔