(ویب ڈیسک)بالی ووڈ کے دبنگ ہیرو سلمان خان کی سابقہ گرل فرینڈ سومی علی نے ان کے حوالے سے حیران کن دعویٰ کردیا۔
بھارتی میڈیا کے مطابق سومی علی نے ایک حالیہ انٹرویو میں انکشاف کیا ہے کہ وہ خود بھی سلمان خان کے ساتھ آئوٹ ڈور شوٹنگ کے دوران شکار پر جاتی تھیں، سلمان خان کو خود بھی نہیں معلوم تھا کہ بشنوئی برادری کالے ہرن کی پوجا کرتی ہے،کیا آپ کے خیال میں سلمان خان واحد شخص ہیں جو اس علاقے میں شکارکے لیے جاتا ہے؟ آخر یہ لوگ صرف سلمان خان کے پیچھے کیوں پڑے ہیں؟
سومی علی نے کہاکہ بشنوئی برادری کو یہ سمجھنا پڑے گا کہ سلمان خان کو کالے ہرن کی پوجا کے بارے میں کچھ نہیں معلوم تھا اور اس نے مجھے یہ بتایا بھی تھا کہ وہ کچھ نہیں جانتا ہے۔
بھارتی میڈیا کو دیئے گئے ایک انٹرویو میں سومی علی نے کہا کہ سلمان خان ایسی چیز کے لیے کیوں معافی مانگیں گے جس کے بارے میں وہ خود بھی نہیں جانتے تھے،آج میرا اس سے یا اس کے خاندان سے کوئی تعلق نہیں ہے لیکن میں یہ کبھی نہیں چاہوں گی کہ کوئی بالی ووڈ اسٹار مارا جائے کیونکہ تشدد کسی بھی مسئلے کا حل نہیں ہے۔
سلمان خان کی سابقہ گرل فرینڈ نے یہ بھی کہا کہ لوگ سلمان خان کو بہت مغرور سمجھتے ہیں کیونکہ ان کے پاس شہرت ہے ، لیکن یہ سوچ غلط ہے، سلمان خان بہت اچھا انسان ہے ،اس کی ایک این جی او بھی ہے۔
واضح رہے کہ پاکستانی نژاد امریکی اداکارہ، مصنفہ اور فلم میکر سومی علی نے بالی ووڈ میں ایک مختصر عرصے کے دوران کام بھی کیاتھا،انہوں نے 1990 کے عشرے کے کئی بڑے اداکاروں کے ساتھ کام کیا، سلمان خان کے ساتھ ان کے تعلقات کے حوالے سے خبریں زوروں پر رہیں،اس حوالے سے سومی علی نے دعوٰی کیاتھاکہ وہ فلوریڈا سے بھارت صرف سلمان خان سے شادی کےلیے آئی تھیں تاہم سلمان خان نے اُنہیں دھوکا دیا۔