مسجد الاقصیٰ میں دوبارہ جھڑپیں۔اسرائیلی پولیس کا دھاوا۔31 فلسطینی زخمی 

(ویب ڈیسک)مقبوضہ بیت المقدس میں واقع مسجد الاقصیٰ کے احاطے میں اسرائیلی پولیس اور فلسطینیوں کے درمیان دوبارہ جھڑپوں کے نتیجے میں31 فلسطینی زخمی ہوگئے۔

العریبہ ٹی وی چینل کے مطابق جمعے کی صبح اسرائیلی پولیس مسجد کے احاطے میں داخل ہوئی اور وہاں موجود فلسطینی نوجوانوں پر آنسو گیس پھینکی اور ربڑ کی گولیاں چلائیں۔مقبوضہ بیت المقدس سے ملنے والی اطلاعات میں بتایا گیا ہے کہ فلسطینی نوجوانوں نے اسرائیلی پولیس کی جانب پتھراؤ کیا تھا جس کے بعد پولیس مسجد کے احاطے میں داخل ہوئی اور ربڑ کی گولیوں کے علاوہ سٹن گرینیڈ بھی پھینکے۔اسرائیلی پولیس کے مطابق صبح کی نماز سے پہلے پتھراؤ کا سلسلہ شروع ہو گیا تھا تاہم پولیس اہلکاروں نے نماز ختم ہونے کا انتظار کیا جس کے بعد وہ احاطے میں داخل ہوئے۔چند بڑی عمر کے فلسطینیوں نے نوجوانوں کو پتھر پھینکنے سے روکا بھی لیکن درجنوں کی تعداد میں نقاب پوش نوجوانوں نے پولیس کی جانب پتھراؤ کیا اور آتش بازی کی۔صورتحال تب قابو میں آئی جب فلسطینیوں کا ایک گروہ مسجد میں داخل ہوا اور جمعے کی نماز سے پہلے صفائی کرنے کی خواہش کا اظہار کیا جس کے بعد پولیس مسجد کے گیٹ سے باہر نکل گئی۔فلسطینی ریڈ کریسنٹ میڈیکل سروس کا کہنا ہے کہ کم از کم 31 فلسطینی زخمی ہوئے ہیں جن میں سے 14 کو ہسپتال پہنچایا گیا۔پولیس کے مطابق ایک خاتون پولیس افسر کے چہرے پر بھی پتھر لگا تھا جنہیں طبی امداد فراہم کی گئی۔

بریکنگ نیوز: مسجد اقصیٰ کے کمپاؤنڈ میں اسرائیلی فوج سے جھڑپوں میں 30 فلسطینی زخمی- آخری عشرے میں سیکڑوں فلسطینی مسجد اقصیٰ میں اعتکاف کے لیے جوق در جوق آتے ہیں-https://t.co/uYoLx4SHWx pic.twitter.com/kwAMBHLjbp

— العربیہ اردو (@AlArabiya_Ur) April 22, 2022

رپورٹ کے مطابق اردن اور فلسطین نے اسرائیل پر الزام عائد کیا ہے کہ زیادہ تعداد میں یہودیوں کو مسلمانوں کے مقدس مقام پر آنے کی اجازت دے کر معاہدے کی خلاف ورزی کی جا رہی ہے۔گذشتہ سالوں کی طرح اس مرتبہ بھی ماہ رمضان کے آخری دس دنوں میں یہودیوں کی اس مقام پر آنے کی پابندی عائد ہے تاہم اس سال یہودیوں کا تہوار عید الفصح بھی رمضان کے ساتھ ہی آیا ہے جبکہ عیسائیوں کی چھٹیاں بھی اسی دوران ہیں۔ یہی وجہ ہے کہ تینوں مذاہب کے ماننے والوں کا آج کل مقبوضہ بیت المقدس کے قدیمی علاقوں میں رش لگا ہوا ہے۔

یہ بھی پڑھیں: مائیک ٹائسن کا ایک بار پھر دھماکہ۔ ویڈیو سوشل میڈیا پر وائرل