(24 نیوز)آپ یہ جان کر حیران ہونگے کہ دارالحکومت لاہور میں ایک دلچسپ اور عجیب واقعہ منظر عام پر آیا ہے، جب سیف سٹی کیمروں نے 12 سال پہلے چوری ہونیوالی موٹر سائیکل کا آرٹیفیشل انٹیلجنس کے ذریعے ٹریفک کی خلاف ورزی پر کیا گیا چالان موٹرسائیکل کے مالک کو بھیج دیا ،شہری دم بخود ہو گیا کہ 12سال قبل چوری ہونیوالی موٹرسائیکل تو نہ ملی بلکہ چالان مل گیا۔
رپورٹ کے مطابق شہری امین کا کہنا ہے کہ جس موٹر سائیکل کی ٹریفک خلاف ورزی کا چالان انہیں گھر پر موصول ہوا ہے وہ 12 سال پہلے چوری ہو گئی تھی۔انہوں نے بتایا کہ ’میں گذشتہ روز نیند سے جاگا تو باہر سے گھنٹی بجی جس کے بعد مجھے ایک ٹریفک خلاف ورزی کا چالان دیا گیا۔ میں نے اسے غور سے دیکھا تو پتا چلا کہ جس موٹر سائیکل کا چالان آیا ہے وہ تو میرے استعمال میں اب نہیں ہے۔ بلکہ آج سے 12 سال پہلے وہ چوری ہو گئی تھی اور اس کی میں نے ایف آئی آر بھی تھانے میں درج کروائی تھی۔گمشدہ موٹرسائیکل کے مالک امین کا کہنا تھا کہ ’میں نے پولیس سٹیشن کے بڑے چکر لگائے لیکن پولیس میری موٹر سائیکل کا سوراغ نہ لگا سکی۔ لیکن اب سیف سٹی کے کیمرے بتا رہے ہیں کہ وہ موٹر سائیکل اب بھی لاہور کی سڑکوں پر چل رہی ہے۔ میں نے اب اپنے تھانے کو چالان دکھایا ہے اور وہ کہہ رہے ہیں کہ ایک مرتبہ پھر سے وہ میری موٹرسائیکل کو ڈھونڈنے کی کوشش کریں گے۔
یہ بھی پڑھیں:آئی پی ایل,نئے کھلاڑیوں نے ’’وخت‘‘ ڈال دیا،دھونی سمیت سینئر کا اگلا سیزن مشکوک