(ویب ڈیسک)بھارتی ریاست گجرات کے شہر امریلی میں تربیتی طیارہ گر کر تباہ ہو گیاہے ، حادثے میں پائلٹ بھی جان کی بازی ہار گیا ۔
بھارتی میڈیا کے مطابق حادثہ دوپہر 12:30 بجے کے قریب گریا روڈ کے علاقے میں پیش آیا۔ سپرنٹنڈنٹ پولیس سنجے کھارات کے مطابق پائلٹ طیارہ اکیلا اڑا رہا تھا اور امریلی ایئرپورٹ سے اڑان بھرنے کے کچھ ہی دیر بعد نامعلوم وجوہات کی بنا پر طیارہ گر کر تباہ ہو گیا۔
ابتدائی رپورٹس کے مطابق طیارہ ایک درخت سے ٹکرا گیا اور بعد ازاں شاستری نگر کے قریب ایک خالی پلاٹ میں کریش لینڈنگ کی، خوش قسمتی سے حادثہ کسی گنجان آبادی والے علاقے میں نہیں ہوا، جس کی وجہ سے مزید جانی نقصان سے بچا گیا،حادثے کے بعد طیارے میں آگ لگ گئی لیکن کوئی اور شخص زخمی نہیں ہوا۔
پولیس افسر سنجے کھارات نے تصدیق کی کہ یہ طیارہ دہلی کی ایک نجی ایوی ایشن اکیڈمی کی ملکیت تھا جو امریلی ایئرپورٹ سے آپریٹ کر رہی تھی۔
مقامی پولیس نے حادثے کی تحقیقات شروع کر دی ہیں اور حادثاتی موت کا مقدمہ درج کرنے کا عمل بھی جاری ہے۔