(24 نیوز) سینئر وزیر سندھ شرجیل میمن کا کہنا ہے کہ بانی پاکستان تحریک انصاف(پی ٹی آئی) عمران خان ملک میں فرعون کی طرح کام کر رہا تھا یہ سب کو یاد ہے۔
نیوز کانفرنس میں شرجیل میمن نے کہا کہ 9 مئی واقعات کے پیچھے ایک ہی شخص تھا وہ ہے عمران خان، پی ٹی آئی انتشار اور ملک کو نقصان پہنچانے کی کوشش کرتی ہے، سابق وزیر اعظم کی ہدایات پر ان کی پارٹی کے لوگ شرپسندی کرتے ہیں۔
شرجیل میمن نے کہا کہ عمران خان غیر ملکی ایجنڈے پر عمل پیرا ہیں، وہ لندن میں زید گولڈ سمتھ کی حمایت کر رہے ہیں، پی ٹی آئی نے پروپیگنڈے سے عالمی سطح پر پاکستان کو بدنام کیا، پی ٹی آئی فارن فنڈنگ کیس میں رنگے ہاتھوں پکڑی گئی تو کیس میں 6 سال تک اسٹے آرڈر لیا گیا، بانی پی ٹی آئی نے سائفر کا ڈرامہ رچایا۔
انہوں نے کہا کہ اسرائیل لابی کی جانب سے عمران خان کی حمایت سوالیہ نشان ہے، بانی پی ٹی آئی نے لندن میئر انتخاب میں پاکستانی کے مقابلے یہودی کو سپورٹ کیا۔
’بانی پی ٹی آئی کے کہنے پر ان کے دور میں رہنماؤں کی گرفتاریاں ہوئیں، ان کے کہنے پر سابق چیف جسٹس پاکستان ثاقب نثار نے آئین کی دھجیاں اڑائیں، عمران خان نے اپوزیشن رہنماؤں کو چن چن کر نشانہ بنایا جبکہ ثاقب نثار نے ان کا آلہ کار بن کر رہنماؤں کی کردار کشی کی۔‘
صوبائی وزیر کا کہنا تھا کہ ثاقب نثار نے ڈیم فنڈ کے نام پر عوام کو دھوکا دیا اور بے وقوف بنایا، انہوں نے تشدد کرنے والے ایک شخص کو ڈیم فنڈ میں پیسے دینے پر معاف کیا۔
یہ بھی پڑھیں: پاکستان کا سب سے جھوٹا شخص عمران خان ہے، پرویز خٹک