پاکستان میں مارشل آرٹس کے بانی اشرف طائی کی طبعیت بگڑ گئی، سانس لینے میں دشواری

(24نیوز)شدید علالت کا شکار پاکستان میں مارشل آرٹس کے بانی اشرف طائی  کی طبعیت ایک مرتبہ پھر بگڑ گئی، بلڈ پریشر اور  شوگر میں مبتلا 77 سالہ  اشرف طائی سانس لینے میں تکلیف کی بنا پر نجی ہسپتال میں زیر علاج ہیں۔

اہلیہ نے  دعاؤں کی درخواست کردی، ثمینہ شاہ کے مطابق ان کے شوہر اشرف طائی کے علاج معالجہ پر خطیر رقم خرچ ہورہی ہے  اور ہسپتال  کی بھاری واجب الادا رقم ادا کرنا محال ہوگیا ہے، اعلٰی حکام اور ذمہ داران توجہ دیں۔

ثمینہ اشرف کا کہنا ہے کہ دیگر کھیل والوں کو کروڑوں روپے دیے جاتے ہیں، دنیا بھر میں پاکستان کا نام روشن کرنے والے اشرف طائی آج بیماری میں مشکلات کا شکار ہیں، وفاقی حکومت اور گورنر سندھ کی جانب سے ان کی کوئی مدد نہیں کی گئی۔

اشرف طائی کی انجیو گرافی رپورٹ کے مطابق ہارٹ اٹیک سےان  کے دل  کا متاثرہ حصہ ناکارہ ہوگیا ہے، گرینڈ ماسٹر کے دونوں گردے پہلے ہی فیل ہو چکے ہیں، مارشل آرٹ میں گراں قدر خدمات  پرحکومت پاکستان کی جانب سے صدارتی تمغہ حسن کارکردگی پانے والے اشرف طائی  1970 میں میمانمار(اس وقت برما) سے پاکستان منتقل ہوئے تھے۔

اشرف طائی کو  مقامی سینما میں پیش آنے والے واقعے کے بعد قومی سطح پر مقبولیت حاصل ہوئی تھی،اشرف طائی نے بلیک میں  ٹکٹ فروخت کرنے والے 14 رکنی گروہ کی تن تنہا پٹائی کی تھی۔

بعد ازاں شرف تائی نے ہل پارک میں چھوٹے سے سینٹر میں تربیت فراہم کرنے کا آغاز کیا، بروس  لی کی ایکشن فلموں کی شہرت کے بعد  اشرف طائی بھی راتوں رات پاکستان میں مشہور ہوگئے تھے۔

 یہ بھی پڑھیں:سابق رکن اسمبلی کا اپنے ڈرائیور پر وحشیانہ تشدد،بڑی گرفتاری عمل میں آ گئی