اسرائیل نے لبنان پر بھی حملوں کا آغاز کر دیا

 (24 نیوز)اسرائیل نے غزہ کے ساتھ لبنان پر بھی دوبارہ حملے شروع کر دیئے ہیں۔

عرب میڈیا کے مطابق اسرائیلی فوج نے لبنان کے مختلف علاقوں پر تقریباً 15 حملے کیے ہیں جن میں 2 افراد جاں بحق اور 8 کے زخمی ہونے کی اطلاعات ہیں۔

اسرائیلی فوج کا کہنا ہے کہ لبنان پر حملوں کا سلسلہ ختم نہیں ہوا، آئندہ گھنٹوں میں لبنان پر مزید حملے کیے جائیں گے۔

اسرائیلی میڈیا کے مطابق آج صبح لبنان سے اسرائیل پر تین راکٹ فائر کیے گئے، اسرائیلی فوج نے راکٹ حملہ ناکام بنانے کا دعویٰ بھی کیا۔

حزب اللہ نے اسرائیلی حملوں پر ردعمل میں کہا کہ اسرائیل پر راکٹ حملے میں حزب اللہ کا کوئی ہاتھ نہیں، لبنان میں جنگ بندی معاہدے کی مکمل پابندی کر رہے ہیں۔

حزب اللہ کا کہنا ہے کہ اسرائیل راکٹ حملے کا بہانہ بنا کر لبنان پر دوبارہ جنگ مسلط کرنا چاہتا ہے۔

دوسری جانب غزہ میں بمباری سے 48 گھنٹوں میں مزید 130 فلسطینی شہید ہوگئے جب کہ پانچ روز میں شہدا کی تعداد 630 سے زیادہ ہوگئی، ایک لاکھ 20 ہزار سے زیادہ فلسطینی دوبارہ دربدر ہوگئے۔

اقوام متحدہ انسانی امور ایجنسی نے غزہ کی بدترین انسانی صورتِ حال پر شدید تشویش کا اظہار کرتے ہوئے امداد کی فوری بحالی کا مطالبہ کیا ہے۔

یہ بھی پڑھیں:غزہ پر اسرائیلی بمباری سے مزید 59 فلسطینی شہید