(ویب ڈیسک)پرواز کے دوران ایک مسافر کے کھانے سے نکلنے والے زندہ چوہے نے طیارے کی ایمرجنسی لینڈنگ کروادی۔
غیر ملکی میڈیا کے مطابق واقعہ ڈنمارک کی ایئر لائن میں پیش آیا جب دورانِ پرواز ایک خاتون مسافر کے کھانے سے چوہا نکل آیا۔
رپورٹ کے مطابق ڈنمارک کی ایئر لائن میں سوار خاتون مسافر کے کھانے سے زندہ چوہا نکل آیا ،جس کے بعد پائلٹ کو طیارے کی ایمرجنسی لینڈنگ کرنا پڑگئی۔
رپورٹ میں بتایا گیا کہ مسافر طیارہ ناروے کے دارالحکومت اوسلو سے اسپین کے شہر ملاگا جا رہا تھا، جس دوران خاتون کو کھانے کا ایک باکس پیش کیا گیا، جیسے ہی خاتون مسافر نے اپنے کھانے کا ڈبہ کھولا تو اس میں سے چوہا نکل آیا جس کی وجہ سے جہاز کو ڈنمارک کے شہر کوپن ہیگن میں ہنگامی لینڈنگ کرنا پڑی۔
یہ بھی پڑھیں: پروازیں منسوخ ،جہازوں کو تالے لگ گئے
اس حوالے سے ایئرلائن انتظامیہ نے کہا کہ یہ ہنگامی لینڈنگ کمپنی کی پالیسی کے عین مطابق ہے کیونکہ جہاز میں چوہے کا ہونا ایک خطرہ تھا، تاہم اس جہاز کے مسافروں کو بعد میں ایک دوسرے طیارے کے ذریعے سپین بھیجا گیا۔
اس واقعے کے عینی شاہد نے ایک ریکارڈ کردہ ویڈیو میں بتایا کہ ان کے ساتھ بیٹھی خاتون مسافر نے جیسے ہی اپنے کھانے کا باکس کھولا تو اس سے چوہا بھاگ کر کہیں جہاز میں چھپ گیا۔