(راؤ دلشاد) تین روزہ دورہ پر پاکستان میں موجود ایرانی صدر کا کہنا ہے کہ پاکستان کیساتھ توانائی سمیت دیگر شعبوں میں بھی تعاون بڑھایا جائیگا۔
تفصیلات کے مطابق ایرانی صدر ابراہیم رئیسی آج ایک روز کیلئے لاہور پہنچے لاہور ایئر پورٹ پر وزیر اعلیٰ پنجاب مریم نواز نے ان کا استقبال کیا جس کے بعد وہ شاعر مشرق ڈاکٹر علامہ اقبال کے مزار پر پہنچے جہاں رینجر کی جانب سے انہیں گارڈ آف انر دیا گیا اس کے بعد وہ جی سی یونیورسٹی لاہور پہنچے جہاں انہوں نے بچوں سے خطاب کرتے ہوئے کہا پاکستان اور ایران کے درمیان توانائی سمیت دیگر شعبوں میں تعاون کومزید بڑھایا جائے گا،دونوں ممالک کے درمیان گہرے تاریخی، تہذیبی، مذہبی اور ثقافتی مراسم ہیں ،قوموں کی برادری میں نمایاں مقام حاصل کرنے کے لیے علم و ہنر اور سائنس و ٹیکنالوجی پر خصوصی توجہ دینا وقت کی اہم ضرورت ہے،ہماری یونیورسٹیاں علم و تحقیق کے مراکز ہیں اور تعلیم کے شعبے میں مربوط حکمت عملی سے بہتر نتائج حاصل کئے جا سکتے ہیں۔
ایرانی صدر نے مزید کہا کہ شاعر مشرق علامہ محمد اقبال کے کلام کو ایران میں خصوصی پذیرائی حاصل ہے،پاکستان اور ایران علم و ہنر کے جدید مراکز اور علوم و فنون کے فروغ کے خواہاں ہیں، ایرانیوں کے دل ہمیشہ پاکستانیوں کے ساتھ دھڑکتے ہیں،پاکستان کے لوگوں میں ایران کیلئے خاص محبت پائی جاتی ہے اور اسی طرح کے جذبات ایرانی عوام پاکستانیوں کیلئے رکھتے ہیں ،پاکستان اور ایران کے درمیان مضبوط برادرانہ تعلقات ہیں ، دونوں ملکوں کا رشتہ وقت کے ساتھ ساتھ مزید مضبوط ہو گا۔
ابراہیم رئیسی کا مزید کہنا تھا کہ فلسطین کے حوالے سے پاکستان اور ایران کا موقف واضح ہے،مسئلہ فلسطین کا حل خطے میں امن و استحکام کیلئے ضروری ہے ،مسئلہ فلسطین کا حل صرف مسلم امہ کا نہیں بلکہ پوری دنیا کیلئے اہم ہے،غز ہ میں اب تک ہزاروں فلسطینیوں کو شہید کیا جا چکا ہے ،پاکستان میں اپنے دورے کے دوران مہمان نوازی اور تواضع کو بے حدسراہا،گورنمنٹ کالج لاہور کی وائس چانسلر ڈاکٹر شازیہ بشیر نے استقبالیہ پیش کیا ۔
وائس چانسلر جی سی یونیورسٹی شازیہ بشیر کا کہنا تھا کہ ایران کے صدر کو گورنمنٹ کالج آنے پر خوش آمدید کہتے ہیں،پاکستان اور ایران دونوں ممالک تعلیم کے میدان میں باہمی تعاون سے ترقی کے نئے باب کھول سکتے ہیں،دونوں ممالک کے درمیان دوستی اور محبت کا رشتہ مزید پروان چڑھ سکے،تقریب کے آ خر میں وی سی ڈاکٹر شازیہ بشیر نے فارسی میں اشعار پڑھے،اس موقع پر وفاقی وزیر ریاض حسین پیرزادہ، سینئر صحافی و ادیب مجیب ا لرحمان شامی سمیت پروفیسرز اور طلبہ کی کثیر تعداد موجود تھی۔
یہ بھی پڑھیں : ایرانی صدر کا دورہ لاہور مکمل ، رنگ روڈ سمیت تمام سڑکیں کھول دی گئیں