(ویب ڈیسک)پاکستان پیپلز پارٹی کی رہنما شرمیلا فاروقی نے اداکار دانش تیمور کے چارشادیوں سے متعلق بیان پر اپنا ردعمل دےدیا ۔
شرمیلا فاروقی نے حال ہی میں نجی چینل کے پروگرام میں شرکت کی جہاں میزبان نے مختلف معروف شخصیات سے متعلق ان کے خیالات جاننے کی کوشش کی،میزبان نے جوں ہی اداکار دانش تیمور کا نام لیا تو پی پی پی رہنما نے گہری سانس لیتے ہوئے اداکارہ عائزہ خان کو معصوم قرار دے دیا۔
شرمیلا فاروقی نے کہا کہ دانش تیمور ایک الگ ہی کریکٹر ہیں جبکہ ان کی اہلیہ عائزہ خان اتنی اچھی، سلجھی ہوئی، شریف، بہت معصوم خاتون ہیں، میں انہیں سلام پیش کرتی ہوں کہ انہوں نے معصومیت اور شرافت سے اپنے شوہر کی باتیں سنیں کہ انہوں نے بڑا احسان کیا ان پر کہ میں چار شادیاں کرسکتا ہوں لیکن فی الحال مجھے آپ ہی سے محبت ہے، یہ بہت توہین آمیز تھا۔
شرمیلا فاروقی کے تبصرے پر میزبان نے کہا کہ لوگ کہتے ہیں کہ جب میاں بیوی کو کوئی اعتراض نہیں تو پھر آپ کو کیا مسئلہ ہے،میزبان کے سوال پر انہوں نے کہا کہ ہمارے معاشرے میں خواتین خصوصاً بیویوں کو بہت کچھ برداشت کرنا پڑتا ہے، وہ ایک لائیو شو میں بیٹھے ہوئے تھے جہاں عائزہ خان بے چاری اُٹھ کر اپنے میاں کو کیا کہتی، پتہ نہیں گھر جا کر بھی کچھ بولا ہوگا یا نہیں، لیکن ہمارا معاشرہ ایسا ہے جہاں خواتین کو دبایا جاتا ہے، انہیں سائیڈپر لگانے کی کوشش کی جاتی ہے ایسے میں آپ ایک اسٹار ہیں لوگ آپ کی پیروی کرتے ہیں آپ سے سیکھتے ہیں تو بہتر ہے کہ کوئی اچھی بات کرلو۔
یہ بھی پڑھیں:ماڈلنگ سے کتناکماسکتے ہیں؟ ماڈل شہزاد نور نے اہم انکشاف کردیا
یہ پہلا موقع نہیں ہے جب شرمیلا فاروقی نے اداکار دانش تیمور کو 4 شادیوں کے بیان پر آڑے ہاتھوں لیا ہو،اس سے قبل بھی انہوں نے انسٹاگرام پر طویل پوسٹ شیئر کرتے ہوئے اداکار کو تنقید کا نشانہ بنایا تھا کہ دانش تیمور کا بیان نا صرف ان کے غرور کی عکاسی کرتا ہے بلکہ اس بات کی عکاسی بھی کرتا ہے کہ مرد کس طرح مذہب کو اپنے تسلط کے لیے استعمال کرتے ہیں۔