پنجاب خیبرپختونخوا بارڈر پر سکیورٹی فورسز کی کارروائی، 2 دہشتگرد ہلاک، متعدد زخمی

(24نیوز)پنجاب اور خیبرپختونخوا کی سرحدی پٹی پر تونسہ شریف کے مقام پر قانون نافذ کرنے والے اداروں نے دہشتگردی کے خلاف بڑی کارروائی کرتے ہوئے دو خوارجی دہشتگردوں کو ہلاک کر دیا۔

پولیس ترجمان کے مطابق پولیس، سی ٹی ڈی اور رینجرز کی مشترکہ آپریشن کوتانہ تل کے علاقے میں کیا گیا جہاں دہشتگردوں سے شدید فائرنگ کا تبادلہ ہوا، دہشتگرد بھاری اسلحے، راکٹ لانچرز اور ہینڈ گرنیڈ سے لیس تھے۔ کارروائی کے دوران دو دہشتگرد مارے گئے جبکہ متعدد زخمی حالت میں فرار ہوگئے۔ فائرنگ کے شدید تبادلے کے دوران دہشتگرد جھاڑیوں کی آڑ لے کر پسپائی اختیار کر گئے۔

مقابلے میں ایلیٹ فورس کے اہلکار عدنان حبیب اور سی ٹی ڈی کے اہلکار غضنفر شدید زخمی ہوئے جنہیں فوری طبی امداد کیلئے قریبی ہسپتال منتقل کر دیا گیاہے۔

 پولیس کے مطابق علاقے میں سرچ آپریشن تاحال جاری ہے تاکہ زخمی دہشتگردوں اور ان کے سہولت کاروں کو تلاش کیا جا سکے۔

حکام کا کہنا ہے کہ یہ کارروائی دہشتگردوں کی سرحدی علاقوں میں ممکنہ نقل و حرکت کو روکنے اور امن و امان کی صورتحال کو قابو میں رکھنے کیلئے کی گئی تھی۔

 سیکیورٹی فورسز کی بروقت اور بہادرانہ کارروائی سے ایک بڑا سانحہ ٹل گیا۔