جنوبی کوریا میں 6G نیٹ ورک پر کام شروع کر دیا گیا

(ویب ڈیسک ) پاکستان سمیت دنیا میں کئی ایسے ملک موجود  ہیں جن میں 5G متعارف نہیں کروایا گیا ،  لیکن جنوبی کوریا میں اب 6G نیٹ ورک پر کام شروع کردیا گیا ہے۔

میڈیا رپورٹس کے مطابق جنوبی کوریا کی وزارت سائنس و انفارمیشن ٹیکنالوجی نے اعلان کیا ہے کہ ملک میں جدید سافٹ ویئر پر مبنی موبائل نیٹ ورکس کو مزید بہترین بناکر 6G نیٹ ورک لانے کی تیاری کررہے ہیں۔6G نیٹ ورک کے لئے جنوبی کوریا کی حکومت مقامی کمپنیوں کو مواد، پرزے اور آلات تیار کرنے کی ترغیب دے گی۔

اس کے علاوہ نیٹ ورک سپورٹ کرنے کے لیے مواد اور پرزہ جات کی رسد کو ہر صورت مربوط رکھنے کا منصوبہ بھی بنایا جارہا ہے۔بنیادی 6G نیٹ ورکنگ پر تحقیق کے لیے ایک فزیبلٹی رپورٹ پہلے ہی جاری کی جاچکی ہے۔جنوبی کوریا کے حکام کے مطابق 6G منصوبے پر 48 کروڑ 21 لاکھ امریکی ڈالرز کے مساوی رقم کا تخمینہ لگایا گیا ہے۔ جو کہ پاکستانی کرنسی کے مطابق 40 ارب روپے سے زائد بنتے ہیں۔

ضرور پڑھیں : خلائی سیاحت کیلئے بیلون فلائٹ کی نمائش کرا دی گئی

اس منصوبے کا مقصد جنوبی کوریا کو انٹر نیٹ نیٹ ورکنگ کے میدان میں دنیا کو پیچھے چھوڑنا ہے۔ یہ منصوبہ 2026 سے 2028 کے درمیان حقیقت کا روپ دھار لے گا۔ اس طرح جنوبی کوریا 6G نیٹ ورک لانچ کرنے والا پہلا ملک بن سکتا ہے۔