(ویب ڈیسک)کراچی میں معروف اداکار کے بیٹے اور نوجوان اداکار کو گرفتارکرکے اس کے قبضے سے منشیات برآمد کرنے کا دعویٰ کیاگیا ہے۔
ڈپٹی انسپکٹر جنرل سی آئی اے مقدس حیدرکاکہناہے کہ نوجوان مصطفیٰ عامر کے حالیہ قتل کے بعد ڈی ایچ اے میں کریک ڈاؤن جاری ہے، جبکہ ایک نوجوان اداکار کو گرفتار کیاگیا ہے جس کی تحویل سے منشیات بھی برآمد ہوئی ہے۔
سربراہ سی آئی اے کے مطابق پولیس نےکراچی کے علاقے ڈیفنس ہاؤسنگ اتھارٹی میں کارروائی کرتے ہوئے نوجوان اداکار ساحر حسن کو گرفتار کیا اور اس کے گھر سے آدھا کلو منشیات برآمد کرلی ہے۔
سربراہ سی آئی اے کے مطابق گرفتار ملزم مختلف چینلز کے ذریعے امریکا سے منشیات درآمد کرتا ہے،وہ شہر کے پوش علاقوں میں پارٹیوں کو منشیات سپلائی کرنے میں ملوث ہے۔
یہ بھی پڑھیں:بالی ووڈ سٹارز پراپرٹی ریس،کس کا بنگلہ مہنگا، شاہ رخ یا امیتابھ بچن کا؟
ڈی آئی جی مقدس حیدر نے وضاحت کی کہ ساحر حسن کو مصطفیٰ عامر قتل کیس کے سلسلے میں گرفتار نہیں کیا گیا بلکہ اس کیس کے بعد منشیات کے خلاف مہم کے دوران حراست میں لیا گیا،ایسے عناصر کے خلاف کریک ڈاؤن شروع کیا ہے، جو پوش علاقوں میں پارٹیوں اور تعلیمی اداروں کے طلبہ کو منشیات فراہم کرنے میں ملوث ہیں۔
مقدس حیدر کے مطابق گرفتار ملزم کے خلاف ایف آئی آر درج کی جا رہی ہے۔