ٹرمپ کا طالبان سے امریکی اسلحہ واپس لینے کا اعلان

(24 نیوز) صدر ڈونلڈ ٹرمپ نے کہا ہے کہ طالبان کو امداد دینے پر اعتراض نہیں ہے لیکن ان سے امریکی اسلحہ واپس لینا ہوگا۔

امریکی صدر نے کہا کہ امریکا افغانستان کو ماہانہ ڈھائی ارب ڈالر امداد دے رہا ہے، طالبان سے اسلحہ واپس لینا ہوگا چاہے اس کے لیے انہیں مزید رقم ہی کیوں نہ دینی پڑے۔

ٹرمپ کا کہنا تھا کہ طالبان کو امریکی گاڑیوں اور اسلحہ کے ساتھ پریڈ کرتا دیکھ کر مجھے بہت غصہ آتا ہے۔

ان کا کہنا ہے کہ امریکا سے اچھا اور نیا فوجی سازو سامان تو طالبان کے پاس رہ گيا ہے اور طالبان ٹینکوں، گاڑیوں، ہتھیاروں اور جدید ٹیکنالوجی سمیت امریکی فوجی سامان فروخت کررہے ہیں۔

ٹرمپ نے حکام پر زور دیا کہ وہ اس معاملے کو سنجیدگی سے دیکھیں اور سازوسامان کی واپسی کے لیے اقدامات کریں۔

خیال رہے کہ ٹرمپ اپنی انتخابی مہم کے دوران بھی کئی بار افغانستان سے امریکی فوجی سازو سامان کی واپسی کا ذکر کرچکے ہیں۔

افغانستان میں چھوڑے گئے امریکی فوجی سازوسامان میں فوجی گاڑیاں، جدید ہتھیار اور طیارے شامل ہیں، پینٹاگون کے مطابق اس فوجی سازوسامان کی مجموعی مالیت 7 ارب ڈالر سے زائد ہے۔

مزید پڑھیں : امریکیوں کی اکثریت نے ٹرمپ کے غزہ منصوبے کی مخالفت کردی