آج ملک بھر میں یوم پاکستان ، مساجد میں ملکی سلامتی کیلئے دعائیں، توپوں کی سلامی سے آغاز ، اللہ اکبر کے نعرے

(24 نیوز)آج ملک بھر میں یوم پاکستان روایتی جوش و جذبے سے منایا جا رہا ہے۔مساجد میں ملکی سلامتی، خوشحالی کی دعاؤں کیساتھ عظیم دن کا آغاز  وفاقی دارالحکومت میں 31 اور صوبائی دارلحکومتوں میں 21،21 توپوں کی سلامی سے ہوا ۔ جوانوں نے اللہ اکبر  اور   پاکستان زندہ باد کے فلک شگاف نعرے لگائے۔ 

تفصیلات کے مطابق آج 23 مارچ 2021 کو 81 واں یوم پاکستان بھر پور ملی جوش و جذبے کے ساتھ منایا جارہا ہے۔ 23 مارچ کی مناسبت سے ملک بھر میں عام تعطیل کا اعلان کیا گیا ہے۔دن کے آغاز پر پاک فوج کی جانب سے توپوں کی سلامی دی گئی۔ نماز فجر کے بعد ملکی سلامتی و خوشحالی کے لیے خصوصی دعائیں مانگی گئیں۔لاہور اور پشاور میں21،21 توپوں کی سلامی کے ساتھ یوم پاکستان کا آغاز ہوا۔ لاہور میں محفوظ شہید گیریژن میں یہ سلامی دی گئی۔کورونا ایس اوز پیز کو مد نظر رکھتے ہوئے ملک بھر میں تقریبات منعقد کی جائیں گی اور تمام سرکاری و نجی عمارتوں پر قومی پرچم لہرائے جائیں گے۔

آئی ایس پی آر کے مطابق بارش کے باعث 23 مارچ کی پریڈ اب 25 مارچ کو منعقد کی جائے گی۔آئی ایس پی آر کا کہنا ہے کہ پریڈ میں تینوں مسلح افواج سمیت مختلف اداروں کے دستے حصہ لیں گے۔ 25 مارچ کی پریڈ کا وقت اور مقام وہی ہو گا جو پہلے سے طے شدہ ہے۔