(ویب ڈیسک) پاکستان کےمعروف گلوکار عاطف اسلم کے ہاں رمضان المبارک کے پہلے روزے ننھی پری کی آمد ،گلوکار نے مداحوں کے ساتھ بیٹی حلیمہ کی تصویر شیئر کردی۔
تفصیلات کے مطابق عاطف اسلم نے فوٹو اینڈ ویڈیو شیئرنگ پلیٹ فارم انسٹاگرام پر اپنی پہلی بیٹی کی تصویر شیئر کرتے ہوئے مداحوں کو خوشخبری سُنائی ہے کہ" وہ اور ان کی اہلیہ 2بیٹوں کے بعد ایک بیٹی کے بھی والدین بن گئے ہیں"۔
عاطف اسلم نے کیپشن میں لکھا کہ "آخر کار انتظار ختم ہوا, میرے دل کی نئی ملکہ آگئی بچہ اور سارہ دونوں ٹھیک ہیں الحمدللہ۔ براہ کرم ہمیں اپنی دعاؤں میں یاد رکھیں"۔گلوکار نے بیٹی کا نام بتاتے ہوئے رمضان کی مبارکباد بھی دی ، انہوں نے لکھا کہ " حلیمہ عاطف اسلم کی طرف سے رمضان مبارک۔" عاطف اسلم نے اپنی بیٹی کا نام حلیمہ عاطف اسلم رکھا ہے۔
تصویر شیئرکرنے کے ساتھ شوبز انڈسٹری سے تعلق رکھنے والے بالی ووڈ اور لالی ووڈ اداکاروں کی جانب سے مبارکباد کی سلسلہ جاری ہے، جبکہ مداحوں کی جانب سے بھی نیک تمناوَں کا اظہارکیا جارہاہے۔