لاڑکانہ : آپریشن کے دوران مریضہ سے زیادتی کا انکشاف

(24نیوز) سندھ کے ضلع لاڑکانہ کے نجی ہسپتال میں درندہ صفت ملزموں نے آپریشن کے دوران مریضہ کو زیادتی کا نشانہ بنا ڈالا۔

تفصیلات کے مطابق نجی ٹی وی کی رپورٹ کے مطابق سندھ اسمبلی کے اجلاس میں رکن اسمبلی رعنا انصار نے لاڑکانہ کے نجی ہسپتال میں پیش آنے والے واقعے سے متعلق انکشاف کیا۔اسمبلی میں توجہ دلاؤ نوٹس پیش کرنے کے بعد انہوں نے بتایا کہ ’لاڑکانہ کے نجی ہسپتال میں دورانِ آپریشن مریضہ کو زیادتی کا نشانہ بنایا گیا ہے‘۔

انہوں نے بتایا کہ ’خاتون کوسرجری کیلئے آپریشن تھیٹرمیں لے جاکر بے ہوش کیا گیا اور پھر انہیں تین ملازمین نے زیادتی کا نشانہ بنایا‘۔توجہ دلاؤ نوٹس پر پیش ہونے کے بعد صوبائی وزیر برائے ترقی نسواں  شہلا رضا نے اس واقعے سے متعلق مزید تفصیلات ایوان میں پیش کیں۔انہوں نے بتایا کہ ’مذکورہ واقعہ 12مارچ کو پیش آیا، جس کا مقدمہ درج کرنے کے بعد ہسپتال کے تین ملزموں کو گرفتار کرلیا گیا‘۔

صوبائی وزیر نے بتایا کہ ’زیادتی کے بعد مریضہ کا میڈیکل بھی کیا گیا، مگر ڈاکٹر کا ڈی این اے میچ نہیں ہوا‘۔صوبائی وزیر نے بتایا کہ وہ اس معاملے کو از خود دیکھ رہی ہیں، واقعے میں ملوث افراد کو کسی صورت رعایت نہیں دی جائے گی بلکہ اُن کے خلاف سخت قانونی کارروائی عمل میں لائی جائے گی۔