(24 نیوز)امریکا کی جانب سے چین سمیت کئی ممالک پر ٹیرف ک نفاذ کے بعد سے دنیا بھر کی معیشت غیر یقینی کی طرف بڑھ رہی ہے اور جب بھی عالمی سطح پر خطرے کی گھنٹیاں بجتی ہیں تو سرمایہ کاروں کا اعتماد ایک بار پھر سونے کی طرف لوٹ آتا ہے، موجودہ صورتحال کے پیش نظر سونے کی قیمت 4 لاکھ روپے تک جانے کا امکان ہے۔
امریکا اور چین کے درمیان تجارتی کشیدگی نے عالمی منڈیوں میں ہلچل مچا دی ہے اور اس کے اثرات پاکستان میں بھی شدت سے محسوس کیے جا رہے ہیں۔ پیر کو سونے کی قیمت میں صرف ایک دن میں 8100 روپے کا اضافہ ہوا، جس کے بعد یہ تاریخی سطح 357,800 روپے فی تولہ تک پہنچ گئی، جو کہ ملکی تاریخ کی بلند ترین سطح ہے، تاہم بدھ کو سونا یکدم ہی 11700 روپے کی بڑی کمی کے بعد تین لاکھ 46 ہزار 100 روپے پر آگیا۔
جنوری 2025ء کے آغاز میں سونا 2 لاکھ 73 ہزار 600 روپے فی تولہ دستیاب تھا، تاہم صرف تین ماہ میں قیمت 85 ہزار روپے سے زیادہ بڑھ چکی ہے۔
مزید پڑھیں:ایشیائی بینک کا پاکستان کیلئے 33 کروڑ ڈالر کی اضافی امداد کا اعلان
لندن بلین مارکیٹ، جو دنیا بھر میں سونے کی قیمت طے کرتی ہے، اُس کے مطابق اِس وقت سونے میں سرمایہ کاری کا رجحان کئی دہائیوں کے بعد دوبارہ تیزی سے اوپر جارہا ہے، پاکستانی ماہرین اور جیولرز بھی یہی بتا رہے ہیں کہ سونا مہنگا ہونے کی بنیادی وجہ مقامی مارکیٹ کا دباؤ نہیں بلکہ عالمی منڈی کی صورتحال ہے۔
آل پاکستان صرافہ جیولرز ایسوسی ایشن کے صدر قاسم شکارپوری کا کہنا ہے کہ امریکا اور چین کی اقتصادی چپقلش، نئی تجارتی پابندیوں اور غیر متوقع پالیسیوں نے سرمایہ کاروں کو متذبذب کر دیا ہے جو سونے کی طلب میں اضافہ کر رہی ہے۔
کراچی جیولرز ایسوسی ایشن کے نائب صدر عبداللہ چاند نے کہا ہے کہ امریکی صدر ڈونلڈ ٹرمپ کی سخت گیر پالیسیوں اور غیر متوقع بیانات نے عالمی سطح پر اعتماد کو دھچکا پہنچایا اور اس کا براہِ راست اثر سونے کی قیمت پر پڑا۔
جیولرز اور تجزیہ کاروں کا ماننا ہے کہ اگر موجودہ رجحان جاری رہا تو اگلے چند مہینوں میں سونا 4 لاکھ روپے فی تولہ تک بھی پہنچ سکتا ہے۔