بھارت نے جارحیت کی تو پوری قوم سیسہ پلائی دیوار بن جائے گی:وزیراعظم آزاد کشمیر

(حسن احسن)وزیراعظم آزاد کشمیر چودھری انوار الحق نے کہا ہے کہ اگر بھارت نے جارحیت کی بھول کی تو پوری کشمیری قوم پاک فوج کے ساتھ سیسہ پلائی دیوار کی مانند کھڑی ہوگی۔

وزیراعظم آزاد کشمیر چودھری انوار الحق نے کشمیر کی قانون ساز اسمبلی سے خطاب کرتے ہوئے کہا کہ بھارت نے اگر جارحیت کرنے کی کوشش کی تو پوری کشمیری قوم مسلح افواج پاکستان اور ان کے سربراہ جنرل عاصم منیر کے ساتھ سیسہ پلائی دیوار کی مانند کھڑی ہوگی۔

انھوں نے کہا کہ بھارت چانکیہ ڈاکٹرائن بغل میں چھری منہ میں رام رام کی پالیسی پر عمل پیرا ہے، پہلگام واقعہ میں بھارت کا جھوٹا بیانیہ بری طرح بے نقاب ہوا، بھارت آزادکشمیر میں بدامنی پھیلانے کے لیے آزاد کشمیر کے اندر چھپ کر وار کر سکتا ہے۔

چودھری انوار الحق نے کہا کہ بھارت بدامنی پھیلانے کے لیے تیسری قوت کو استعمال کر سکتا ہے، اگر بھارت نے ایسا ایڈونچر کرنے کی حماقت کی تو پھر یہ بھی یاد رکھے کہ بھرپور جواب دیا جائے گا۔

وزیراعظم آزاد کشمیر کے مطابق بھارت کو قومی سلامتی کے اجلاس کے بعد مناسب جواب مل جائے گا، بھارتی آبی جارحیت ایک سال سے جاری ہے، بھارت کی بین الاقوامی دہشتگری  بارے دنیا جانتی ہے۔

انھوں نے کہا کہ کینیڈا سے لے کر کشمیر تک بھارت دہشتگردی کو ریاستی پالیسی کے طور پر اپنائے ہوئے ہے، بھارت دنیا کے سامنے ایکسپوز ہو چکا ہے، چند نادان دوستوں کو ہماری باتوں سے اختلاف تھا لیکن آج سوچئے کہ محافظ فوج کون ہے؟ اور قابض فوج کون ہے ؟ ہمارے پرچم کے پیچھے پاکستان کے پرچم کی طاقت ہے ورنہ ایل او سی کے پار آزاد کشمیر کا پرچم کہیں نظر نہیں آتا۔

وزیراعظم آزاد کشمیر کے مطابق جو جمہوری آزادیاں ہمیں یہاں حاصل ہیں وہ جمہوری آزادیاں مقبوضہ کشمیر کے عوام کو دستیاب نہیں، الحمداللہ وزیراعظم آزاد کشمیر مقبوضہ کشمیر کے بہن بھائیوں کے ساتھ کھڑا ہے۔

چوہدری انوارالحق نے کہا کہ مقبوضہ کشمیر کے بہن بھائیوں کے لیے جہاد پر کچھ دوستوں کو تکلیف ہوتی ہے، اس مقدس ایوان میں کھڑا ہو کر کہتا ہوں کہ پاکستان کے اندر سے  بھی سیاسی پولرائزیشن کا خاتمہ کرنا ہوگا اگر بھارت نے ایل و سی پر جارحیت کا ارتکاب کیا تو اس کے جواب میں اقوام متحدہ کا چارٹر ہمیں دفاع کا حق دیتا ہے۔

وزہراعظم آزادکشمیر نے کہا کہ یقین ہے کہ بھارت ایسے کسی بھی طرح کے پاگل پن کا مظاہرہ نہیں کرے گا، مضبوط اور روشن پاکستان تحریک آزادی کشمیر کی ضمانت ہے، مسلح افواج پاکستان کے ساتھ قدم سے قدم ملا کر کھڑے ہونا ہمارا مذہبی اور ملی فریضہ ہے۔

انھوں نے کہا کہ یہ وقت ہے کہ ہم سب یکجہتی کا مظاہرہ کریں،  بھارت آبی جارحیت کا آغاز کر چکا ہے، بھارت پاکستان کے پانیوں پر قبضہ کرنا چاہتا ہے، بھارت نے پونچھ اور دریائے نیلم کے پانیوں پر قبضے کے لیے اقدامات اٹھانا شروع کر دئیے ہیں۔

چوہدری انوارالحق نے بتایا کہ بھارت کے ہتھکنڈے اور دہشتگردانہ وارداتوں بارے بین الاقوامی ثبوت موجود ہیں، میرے ذہن میں دور دور تک اس بات کا شائبہ نہیں کہ نریندر مودی جارحیت کی کوشش کرے گا۔

انھوں نے کہا کہ خطرے سے انکار نہین کرنا چاہئے لیکن خطرے کا درست ادراک کرنا چاہئے، خطرے کو ضرورت سے زیادہ سر پر سوار کرنے کی ضرورت نہیں ہے ہمہ وقت تیار ہیں۔

چوہدری انوارالحق نے کہا کہ قوم اپنی مسلح افواج کے شانہ بشانہ سیسہ پلائی دیوار کی مانند کھڑی ہے، پاکستان ایٹمی ملک ہے، ہندوستان سمیت دنیا میں کسی کی بھی جرأت نہیں ہے کہ وہ پاکستان کی سرحدوں کی خلاف ورزی کرسکے۔

یہ بھی پڑھیں :بجلی کی قیمت میں ایک روپے 9 پیسے کمی کا امکان