بھارتی نژاد اجے بنگا عالمی بینک کے سربراہ نامزد

(ویب ڈیسک) امریکی صدر جو بائیڈن نے کہا ہے کہ واشنگٹن، ماسٹر کارڈ کے سابق چیف ایگزیکٹو اجے بنگا کو عالمی بینک کی سربراہی کیلئے نامزد کر رہا ہے۔

اے ایف پی کی رپورٹ کے مطابق امریکا کی جانب سے یہ اعلان عالمی بینک کے موجودہ سربراہ ڈیوڈ مالپاس کی جانب سے قبل از وقت مستعفی ہونے کے منصوبے کے بعد سامنے آیا۔

ترقیاتی قرض دہندہ نے 29 مارچ تک جاری رہنے والے ایک عمل میں امیدواروں کی نامزدگیوں کو قبول کرنا شروع کیا تھا، بینک کا کہنا ہے کہ خواتین امیدواروں کی ’بہت زیادہ‘ حوصلہ افزائی کی جائے گی۔

خیال رہے کہ عالمی بینک کا صدر عام طور پر امریکی جبکہ عالمی مالیاتی فنڈ کا سربراہ روایتی طور پر یورپی ہوتا ہے۔

امریکا کے نامزد کردہ 63 سالہ اجے بنگا بھارتی نژاد امریکی ہیں اور فی الحال ایکویٹی فرم جنرل اٹلانٹک میں وائس چیئرمین کے طور پر خدمات انجام دے رہے ہیں، اس سے پہلے وہ ماسٹر کارڈ میں چیف ایگزیکٹو تھے۔

Breaking News: The U.S. nominated Ajay Banga, the former chief executive of Mastercard, to be the next president of the World Bank. The selection is likely to drastically reshape the institution and broaden its ambitions to combat climate change.https://t.co/bzWJr2ZMj6

— The New York Times (@nytimes) February 23, 2023

جو بائیڈن نے ایک بیان میں کہا کہ جے بنگا کو ہمارے وقت کے سب سے فوری چیلنجز بشمول موسمیاتی تبدیلیوں سے نمٹنے کیلئے پبلک پرائیویٹ وسائل کو متحرک کرنے کا اہم تجربہ ہے۔

گزشتہ ہفتے عالمی بینک کے موجودہ صدر ڈیوڈ مالپاس، جنہیں 2019ء میں ڈونلڈ ٹرمپ نے اس عہدے کیلئے نامزد کیا تھا، نے کہا تھا کہ وہ تقریباً ایک سال قبل ہی استعفیٰ دے دیں گے۔

ان کے دورِ صدارت میں موسمیاتی تبدیلی کے حوالے سے ان کے مؤقف پر سوالات اٹھتے رہے ہیں۔

باضابطہ طور پر ان کے عہدے کی مدت 2024 میں اختتام پذیر ہونی تھی۔

اجے بنگا کی نامزدگی ایسے وقت میں سامنے آئی ہے کہ جب ترقیاتی قرض دہندگان عالمی مسائل مثلاً ماحولیاتی مسائل کو مزید بھر پور طریقے سے حل کرنے کے خواہاں ہیں۔