قیمت کم ہے۔۔ دوا ساز اداروں نے روسی ویکسین واپس بھجوانے کی دھمکی دے دی

(24نیوز) روسی ویکسین کی مناسب قیمت نہیں لگائی گئی، دو مقامی دوا ساز اداروں نے روسی ویکسین واپس بھجوانے کی دھمکی دے دی۔تفصیلات کے مطابق مقامی دوا ساز کمپنیوں نے عوام کی پہنچ سے کورونا ویکسین بھی دور کرنے کی تیاری کرلی، روسی ویکسین کی قیمت کے تعین میں اختلاف پیدا ہوگیا۔ 
انڈسٹری ذرائع کے مطابق حکومتی تجویز کردہ قیمت پر ویکسین کی فراہمی ممکن نہیں، اچھی قیمت نہ ملنے پر ویکسین واپس بھجوانے کا آپشن کھلا ہے۔
خیال رہے کہ ڈریپ کی جانب سے روسی ویکسین اسپوتنکV کی 2 خوراک پر مشتمل پیک کی قیمت 8 ہزار 449 روپے مقرر کرنے کی سفارش کی تھی، جبکہ 4 خوراک پر مشتمل پیک کی قیمت 16 ہزار 560 روپے مقرر کی گئی تھی۔اسپوتنک V کی 10 خوراک پر مشتمل پیک کی قیمت 40 ہزار 555 روپے ہوگی، جب کہ 20 خوراک پر مشتمل پیک کی قیمت 81 ہزار 110 روپے ہوگی۔
واضح رہے کہ کراچی کی ایک فارما کمپنی نے روسی ساختہ کرونا ویکسین اسپوتنک V کی 50 ہزار ڈوز درآمد کی ہیں، جب کہ ایک ملٹی نیشنل فارما کمپنی چینی ویکسین درآمد کر رہی ہے، چینی کمپنی کی کرونا ویکسین ایک خوراک پر مشتمل ہے۔